
Rêxistinên jinan ên Brezîlyayê piştgirî dan kampanyaya ‘Em hemû YPJ ne’ 

2026-05-19 18:51:19


	&nbsp;

	NAVENDA NÛÇEYAN - Rêxistinên jinan û derdorên akademîk ên li Brezîlyayê, ji bo pişgiriya bi hêzên parastina jinan ên Rojava re, tevlî kampanyaya “Em hemû YPJ ne” bûn

	&nbsp;

	Ji 26’ê Nîsana 2026’an vir ve, rêxistinên jinan ên li Rojava bi armanca piştgiriya Hêzên Parastina Jinê (YPJ) kampanyayek dan destpêkirin. Ev bang di serdemeke wisa de digihêje me ku nasname û laşê jinê di bin êrîşên giran de ne. Em dibînin ku li seranserî cîhanê baviksalarî, mêtingerî û dijminatiya li hemberî jinê di nava dewlet, artêş û rêveberiyên netew-dewletan de her ku diçe kûrtir e.

	&nbsp;

	Li Brezîlyayê ku ji rastiyeke weha ya dîrokî tê, ji aliyê rêxistinên cuda yên jinan û navendên lêkolînên akademîk ve kampanyaya piştgiriya bi YPJ’ê re hat destpêkirin. Gavên yekem ên kampanyayê li São Paulo ji aliyê Femînîstên Antî-Fasişt û Sosyalîst (FAS), Rêxistina Jinan a Perîferiya Bakur-Rojava û navenda lêkolînên akademîk a li ser meseleya Kurd NUPIEC’ê ve hatin avêtin. Kampanyaya li Brezîlyayê bi vîna tevkariya di gav û destkeftiyên ku jinên li Rojava pêş xistine de hat destpêkirin. Bi wê baweriyê tê tevgerîn ku rêya têkoşîna jinên li Brezîlyayê û Rojava yek e.

	&nbsp;

	Endamên FAS’ê yên ku tevli kampanyaya ‘Em YPJ ne’ bûn, der barê tevlîbûna xwe ya kampanyayê de ev daxuyanî dan: “Têkoşîna berxwedanê ya jinên Kurd û têkoşîna jinên li taxên xizan ên Brezîlyayê yek e. Parastina laş û axa me, mafê me yê xwezayî ye. Divê em çand û kevneşopiyên xwe, di heman demê de perwerdehiya zarok û ciwanên xwe biparêzin. Ji ber vê yekê têkoşîna YPJ’ê, têkoşîna me ye.

	&nbsp;

	Endamên NUPIEC’ê yên ku pêşengiya kampanyayê dikin jî ev yek anîn ziman: “Li hemberî kêmasiya stratejiya hêzên cîhanî, hêza YPJ’ê di têkbirina DAIŞ’ê de diyarker bû. YPJ di navenda şoreşekê de ji bo parastina pergala xwe ya perwerde, ziman, saziyên çandî û qanûnên jinê têdikoşe. Hikûmeta Demkî ya Sûriyeyê dixwaze destkeftiyên jinan bi paş de bibe. Em jî tevli kampanyaya jinên Rojava dibin. Werin em keda bêwestan a YPJ’ê biparêzin!”

	&nbsp;

	Ev qonaxa yekem a kampanyayê li seranserî Brezîlyayê bi xebatên agahdarkirin û ragihandinê dest pê kir. Di mehên Gulan û Hezîranê de jî wekî parçeyek ji kampanyaya ‘Em hemû YPJ ne’, li Brezîlya û Amerîkaya Latîn rêxistinbûna çalakî û nîqaşên cuda tê plankirin.

	&nbsp;