Peyama Ayşe Gokkan: Lêgerîna me ya ji bo azadiyê hîn xurtir bûye

2026-07-03 09:36:26


	 

	NAVENDA NÛÇEYAN - Ayşe Gokkan derbarê cezayê xwe yê 19 sal û 6 mehan ê girtîgehê de peyamek parve kir û got, "Vê biryarê baweriya me ya bi rewatiya têkoşîna ku em bi salan e di warê mafên jinan û mafên mirovan de dimeşînin nehejandiye; berevajî vê, biryardariya me ya di lêgerîna rastî, edalet û azadiyê de hîn xurtir kiriye."

	 

	Tevgera Jinên Azad (TJA) peyamek ji Girtîgeha Jinan a Sîncanê ya ji aliyê berdevka demê ya berê Ayşe Gokkan ve derbarê cezayê wê yê 19 sal û 6 mehan ê girtîgehê de şandiye parve kir.

	 

	Peyama Ayşe Gokkan wiha ye:

	 

	"Di doza li dijî min de ku bi tohmeta endametiya rêxistinekê tê kirin, dadgehê bi tevahî 19 sal û 6 meh cezayê girtîgehê da min û biryara berdewamiya girtina min da. Vê biryarê baweriya me bi rewatiya têkoşîna ku em bi salan e di warê mafên jinan û mafên mirovan de dimeşînin nehejandiye; berevajî vê, biryardariya me ya di lêgerîna rastî, edalet û azadiyê de hîn xurtir kiriye."

	 

	Em ne bi tenê ne

	 

	Ez spasiyên xwe yên herî dilsoz pêşkêşî hemû rêxistinên jinan, rêxistinên girseyî yên demokratîk, parêzvanên mafên mirovan, parêzeran, rêxistinên mafên mirovan ên navneteweyî, nûnerên partiyên siyasî, endamên çapemeniyê û hemû kesên xwedî wijdan dikim ku ji roja yekem a darizandinê heta rûniştina biryarê pêvajoyê ji nêz ve şopandin; yên ku li salona dadgehê, li ber dadgehê û li her deverê ku lê bûn, hevgirtina xwe nîşan dan.

	 

	Ev nîşandana bihêz a hevgirtinê ne tenê ji bo min e; ew îfadeyek watedar a piştgiriya têkoşîna jinan ji bo wekhevî û azadiyê, ji bo mafên mirovan û ji bo daxwaza edaletê ye. Her nîşandana piştgiriyê, her peyama şandî û her dengek ku di vê pêvajoyê de hatiye bilindkirin careke din nîşanî me da ku em ne bi tenê ne.

	 

	'Têkoşîna ji bo jiyaneke bi rûmet ne sûc e'

	 

	Em dizanin ku têkoşîna jinan ji bo azadî, wekhevî û jiyaneke bi rûmet ne sûc e. Bi hêviya ku ji hêla hevgirtinê ve tê xurtkirin, em ê mil bi mil bi her kesê ku têkoşîna ji bo maf û azadiyan didomîne re bisekinin. Ez ji dil û can spasiya her kesê ku bi me re radiweste, dengê xwe li dengê me zêde dike û hêviya me xurt dike, dikim.

	 

	Hevgirtin hêza me ya herî mezin e."