ENQERE - Şandeya Îmraliyê ya DEM Partiyê derbarê hevdîtina bi Rêberê Gelê Kurd Abdullah Ocalan re hatî kirin de daxuyaniyek da û got: "Veguherandina qanûna neyînî bo qanûna erênî pêwîst e. 

 

Dîrok derfetekê pêşkêşî me dike ku em jiyaneke hevpar ava bikin û di wekhevî û edaletê de rûpeleke nû vekin."

 

Şandeya Îmraliyê ya Partiya Wekhevî û Demokrasiyê ya Gelan (DEM Partî) ku ji parlamenter Pervîn Buldan, Mîthat Sancar û parêzer Faîk Ozgur Erol pêk tê duh bi Rêberê Gelê Kurd Abdullah Ocalan re li Girava Îmraliyê hevdîtin kir. Şande têkildarî hevdîtinê daxuyaniyeke nivîskî da. 

 

Di daxuyaniyê de wiha hat gotin: 

 

"Wek Şanda Îmraliyê ya DEM Partiyê, piştî navbereke dirêj, me bi Birêz Abdullah Ocalan re hevdîtineke berfireh kir. Di hevdîtinê de, me bi berfirehî li ser pêşketinên siyasî yên li herêmê, avakirina civakeke demokratîk, qonaxa niha ya pêvajoya aştiyê û çawaniya şekildana çarçoveya qanûnî nîqaş kir.

 

Di hevdîtinê de, Birêz Ocalan ev daxuyanî da ku bi raya giştî re bê parvekirin: 

 

Em sozdar in ku li gorî ruhê banga 27'ê Sibatê gavan bavêjin û pirsgirêkê di çarçoveya hiqûqa xwişk-biratiyê de çareser bikin. Em li ber wê yekê ne ku tifaq û yekîtîya dîrokî ya di navbera Kurd û Tirkan de, rastiyek dîrokî ya li Anatoliyê ku di hemî qonaxên krîtîk de ji hev nayê veqetandin, veguherînin çarçoveyek qanûnî. Rastiya ku 'eger hûn Kurdek ji Tirkek veqetînin, Kurd namîne; ger hûn Tirkek ji Kurdek veqetînin, Tirk namînin' pêşxistina jiyaneke hevpar û wekheviyê ferz dike. Dem hatiye ku qonaxa qanûnî were avakirin ku rêzê li hesasiyetên hevbeş bigire. Bi zanîna ku rêkirina vê rêyê bi sebir fersendek dîrokî ye, werin em dev ji nêzîkatiyên teng, hêsan û xizmetê nade pêşerojê berdin û bi hev re jiyaneke hevpar bihûnin. Divê her kes ji bo destpêkirina pêvajoya qanînî, wekî ku di rapora ku ji hêla Komîsyona Hevgirtina Neteweyî, Xwişk-Biratî û Demokrasiyê ya li Meclisê ve hatî amadekirin de hatî destnîşan kirin, çêtirîn hewl bide da ku pevçûn û çekan bi tevahî ji holê rake û serdemek nû veke. Tifaqa Kurd û Tirkan kevirê bingehîn ê pêşeroja hevpar a Anatoliyê ye. Divê her gavek ku em bavêjin li ser bingeha çanda van axan be. Bi rêya rêziknameyên qanûnî, misogerkirina vê tifaqê bi garantiyên qanûnî yên mayînde û jiyana wekhev û azad di komarek demokratîk de mimkun e.

 

Veguherandina qanûna neyînî bo qanûna erênî pêwîst e. 

 

Dîrok derfetekê pêşkêşî me dike ku em jiyaneke hevpar ava bikin û di wekhevî û edaletê de rûpeleke nû vekin. Ez bi tevahî bawer im ku em ê bi hev re vê derfetê bikar bînin.'

 

Wek şandeyek, em banga girîng a Birêz Ocalan dîrokî dibînin û em careke din tekez dikin ku em biryardariya xwe ya ji bo berdewamiya diyaloga avaker bi hemî saziyên peywendîdar re, nemaze bi Meclîsê re, ji bo pêşvebirina pêvajoyê bi awayekî encam-navendî û ji bo gihîştina çareseriyek mayînde li ser bingeha prensîbên xwişk-biratiyê, tekez dikin.

 

Şandeya Îmraliyê ya DEM Partiyê 2026"