Jinan bertek nîşanî xutbeya Diyanetê dan 2025-08-29 18:41:37     NAVENDA NÛÇEYAN - Li gelek bajaran xutbeyên Serokatiya Diyanetê ku destkeftiyên jinan hedef digirin, ji aliyê jinan hatin protestokirin. Jinan bi daxwaza darizandina berpirsyaran çûn edliyeyan û serlêdana sûc kirin. Xutbeya Serokatiya Karên Diyanetê ku mafên mîrasê yên jinan hedef digirt, li gelek bajaran hate protestokirin.   Mêrsîn    Platforma Jinan a Mêrsînê di vê çarçoveyê de li pêşiya Edliyeya Mêrsînê daxuyanî da. Di daxuyaniyê de pankarta “Diyanet nikare bi xutbe, weaz û daxuyaniyên dijminatiya jinê dikin êrişî destkeftiyên me bike. Em dev ji mafên xwe yên medenî bernadin. Em nahêlin kesek li ser mafê me yê mîrasê nîqaşê bike” hate hilgirtin. Jinan gelek caran dirûşmên “Ne edaleta mêr, edaleta rast” û “Jin bi hev re bihêz in” berz kirin.   Li ser navê platformê Nerîm Karasu metna daxuyaniyê xwend. Nerîm Karasuyê  da zanîn ku xutbeyên Serokatiya Karên Diyanetê di navbera 1-15’ê Tebaxê de li mizgeftan daye xwendin, destkeftiyên jinan hedef digire. Nerîm Karasuyê, got: “Îktîdar, di bin navê ‘parastina malbatê û bihêzkirina wê’ de li dijî jinan polîtîkayên dijber pêş dixe û hewl dide mafên me yên weke hevberdan, nefeqe, tazmînat û hwd. xesp bike. Diyanet jî bi van xutbeyan tundiya mêr birêxistin dike û peyama xespkirina mafên jinan dide.”   Nerîm Karasuyê, got ku di xutbeyan de cilûbergên jinan hedef tên nîşandan, mafê mîrasê tune tê hesibandin û ev tişt anî ziman: “Li şûna hiqûqa medenî, hiqûqa şer-î tê ferzkirin. Em bang dikin ku kesên li dijî wekheviya destûra bingehîn û laîktiyê tevdigerin bên cezakirin.”   Piştî daxuyaniyê, jin çûn Edliyeya Mêrsînê û der heqê Serokatiya Karên Diyanetê serlêdana sûc kir.   Amed    Meclisa Jinan a KESK’a Amedê jî li pêşiya Edliyeya Amedê bi dirûşma “Em dev ji mafên xwe yên medenî bernadin” daxuyanî da. Di daxuyaniyê de pankarta “Em dev ji mafên xwe bernadin” hate hilgirtin. Gelek kes tev li daxuyaniyê bûn. Di daxuyaniyê de dirûşmên “Jin, jiyan, azadî” û “Bijî berxwedana jinan” hatin berzkirin.   Berdevka Meclisa Jinan a KESK’a Amedê Çagla Sanay destnîşan kir ku di serî de Serokê Karên Diyanetê, hemû kesên ev xutbe amade kirin, hemû peywirdarên cemaweriyê yên belav kirin û melayên ev xutbeye xwendin sûc kirine û got: “Diyanet divê wekî hev nêzî hemû olan bibe. Lê helwest û nêzikatiyên ku dê aştiya civakê têk bibe û tundiyê sor bike, raber dike. Sûc dike û teşwîqî sûc dike. Bi vê yekê re Diyanetê Destûra Bingehîn û peymanên navneteweyî binpê kiriye. Bila tavilê lêpirsîn were destpêkirin û berpirsyar hesabê bidin.”   Piştre jî jin çûn edliyeyê û serlêdana sûc kirin.   Dersim    Platforma Jinan a Dersimê jî li Kolana Hunerê daxuyanî da. Li sr navê platformê Serpîl Argin axivî û got ku Diyanetê sûc kiriye. Argin, diyar kir ku ew ê dest ji destkeftî û mafên xwe bernedin.