
Li Londonê wê ‘Konferansa Aştî û Entegrasyona Demokratîk’ bê lidarxistin 

2026-09-25 11:39:02


	&nbsp;

	NAVENDA NÛÇEYAN - Li Londonê "Konferansa Aştî û Entegrasyona Demokratîk" a ku dê di 29-30’ê Îlonê de bê lidarxistin pirsgirêka Kurd, tecrubeyên çareseriya şer û aştiyê ya li herêmê cuda yên cîhanê bê nirxandin.

	&nbsp;

	Paytexta Ingilistan London wê ji konferansekê re malovaniyê bike ku çareseriya siyasî û demokratîk a pirsgirêka Kurd û pêvajoyên aştiyê yên navneteweyî lê bêne nirxandin.

	&nbsp;

	Konferans wê ji aliyê Centre for Kurdish Affairsê ve di 29-30'ê Îlonê de li Hamilton Houseyê bi navê "Konferansa Aştî û Entegrasyona Demokratîk" bê lidarxistin. Gelek siyasetmedarên Kurd, akademîsyen, rojnamevan, nûnên civaka sivîl û pisporên ku di pêvajoyên aştiyê yên welatên cuda de cih girtin wê beşdarî konferansê bibin.

	&nbsp;

	Wezîrê Karên Derve yê Ingilistanê yê berê û Alîkarê Serokwezîr David Lammy, parlamenterên Partiya Karker Catherine West û Bambos Charalambous jî diyar kirin ku ew piştgiriyê didin armancên konferansê.

	&nbsp;

	Di roja destpêkê ya konferansê de wê pêvajoyên aştiyê yên li Îrlanda Bakur, Kolombiya, Efrîkaya Başûr, Welatê Baskê, Katalonya û Tîrol a Başûr bêne nirxandin.

	&nbsp;

	Sernavên muzakere û diyaloga siyasî, derbasbûna ji şer ber bi siyaseta demokratîk, bêçekbûn, jinûve entegrasyon, parvekirina erkê, xweserî û garantiyên destûra bingehîn wê bi tecrûbeyên welatên cuda werin nirxandin.

	&nbsp;

	Victoria Sandino ku beşdarî pêvajoya aştiyê ya li Kolombiyayê bû wê bi rêya dîmen peyamekê ji konferansê re bişîne.

	&nbsp;

	Di rûniştinên 30'ê Îlonê de wê yekser aliyên siyasî, hiqûqî, civakî û herêmî yên pirsgirêka Kurd bêne nirxandin.

	&nbsp;

	Li gel nîqaşa li ser paşeroja siyaseta Kurd, temsîla demokratîk, rêveberiyên xwecihî û rola civaka sivîl û dîasporayê her wiha wê bûyerên li Tirkiye, Sûriye, Iraq û Îranê ya li ser Kurdan jî bê nirxandin.

	&nbsp;

	Di bernameyê de her wiha wê rola jinan a di pêvajoyên aştiyê de, tevlîbûna hindikahiyan, mafên mirovan, azadiya çapemeniyê û lihevkirina civakî werin nirxandin.

	&nbsp;

	Li gel Pervîn Buldan, Gultan Kişanak, Gulistan Kiliç Koçyîgît, Serpîl Kemalbay û Osman Baydemîr wê gelek akademîsyen, rojnamevan û pisporên pêvajoyên aştiyê yên navneteweyî li konferansê amade bin.

	&nbsp;&nbsp;

	Koordînatora Centre for Kurdish Affarisê Nejla Arî anî ziman ku armanc ji konferansê ew e ku tecrûbeyên aştiyê yên li welatên cuda bi tecrûbeyên siyasî yên Kurdan re li ser heman platformê bigihîne hev.

	&nbsp;