Çîgdem Kozan: Semedê aştîye azadiya Abdullah Ocalanî şert a 2025-12-15 10:45:40     ANQARA – Hemsereka OHD’yî ya Anqarayî Çîgdem Kozan ard ziwan ke semedo ke proses weş bidomîyo ganî kanalê diyalogî yê Abdullah Ocalanî dir akerde bibê û va caardişê heqê hêvîye semedê aştîya komelî gama sereyîn a.   Rayberê Şarê Kurdî Abdullah Ocalanî 27ê Sibate de venga “Aştî û Komelê Demokratîkî” da. Abdullah Ocalanî bi vengdayîşê xo bale ant ser qanûnanê ke prosesê pêrodayîşî peynî keno û derbasê komara demokratîkî beno. Komara demokratîkî zî hîrê sernameyan ser o girewt dest. Na çarçewa de sey sîstemê huqûqî yê pêroyî ya wina biname kerd: “Qanûnê Welatîyê Azadî, Qanûnê Aştî û Komelê Demokratîkî, qanûnê azadîye.”    Hemsereka Komeleya Avûkatan a Azadîye (OHD) ya Anqarayî Çîgdem Kozan derheqê babete de qisey kerde.   ‘Ganî kanalê diyalogî nêrê sînorkerdene’   Çîgdem Kozan ard ziwan ke yew şertê esas ke proses weş bidomîyo no yo ke kanalê dîyalogî û pêvînayîşî nêrê sînorkerdene û va: “Birêz Ocalan nameyê hetê kurdî ser o aktoro sereyîn yê muzakereyî yo. Semedo ke her di hetî çareserî wazenê ganî şertê têduştî de bêro viraştiş. Semedo ke proses weş derbas bo ganî kanalê diyalogî akerde bibê.”   ‘Vatişê Birêz Ocalanî do vernîya aştîya komelî abikero’   Çîgdem Kozan va: “Eke vatiş û pêşnîyazê Abdullah Ocalanî hetê heme hetanê komelî ra weş bêrê fehmkerdene do aştîya komelî rayîr abikerê. Qerarê DMME’yî yê binpaykerdişî est o, qerarê heqê hêvîye est o. Ganî Tirkîya goreyê nê têbêgêro û şertê azadîya Birêz Ocalanî virazo. Tirkîya de heqê kerdişê sîyasetî bi destê huqûqî hetê îqtîdarî ra yeno astengkerdene. Ê kesê ke heqê sîyasetê demokratîkî şuxulnenê yenê destbendkerdiş, tepiştiş û dewa înan rê yena akerdene. Ganî dadgehî êdî na rewşa hacetî ra vejîyo. Ganî rol û mîsyonê xo bîyaro ca.”     ‘Ganî problemî bi qiseykerdiş bêrê çareserkerdene’   Çîgdem Kozan dîyar kerd ke DMMEyî eşkera kerd ke bi qerarê Selahattîn Demîrtaş û Fîgen Yuksekdage heqê sîyasetê kurdan ameyo astengkerdene û va: “Bi tepiştişan vernîgirewtişê sîyasetî ame hedefgirewtiş. Bi eşkerayî heqê sîyasetê kurdan ame astengkerdene. Heqê Kurdan dest ra yeno girewtiş. Bi destê dadgehan yeno krîmînalîzekerdene û tepiştiş. Sîyasetê qeyûmî zî berardişê eynî zihnîyetî yo. La sey ke Birêz Ocalanî zî vat problem bi qiseykerdişî ganî bêro çareserkerdene û semedê heqan zeminê huqûqî bêro viraştiş. Çîyê ke îmkan dano têkoşînê sîyasî yê demokratîkî asayîşê huqûqî yo. Nê warî de ferz o. Eke problem bi rayîrê sîyasetê demokratîkî bêro çareserkerdene; naskerdişê heqê sîyasetê demokratîkî, naskerdişê bîyayîşê kurdan, naskerdişê heqê kolektîf ê kurdan nêkewê binê asayîşê aştî zî mumkîn nîyo.”   ‘Çîyo esas azadîya Birêz Ocalanî yo’   Çîgdem Kozan dîyar kerd ke ganî huqûq demokratîk û azad bibo û heta no bêro viraştiş aştî zî mumkîn nîya. Çîgdem Kozan va: “Ganî lezgînî û ewil azadîya Abdullah Ocalanî bêro awankerdiş û heqê hêvîye bêro caardene. Ganî muzakere şert û mercê têduştî de bidomîyo. Ganî sererastkerdişê huqûqî bêrê kerdene. Ganî heqê kolektîf ê kurdan bikewê binê asayîşî. Ganî mesela ziwanî de sererastkerdişê huqûqî bêrê kerdene. Çîyê ke demokratîkbîyayîşê domdar virazeno peymana komelî û destûrêk bingehîn yê newe yo. Prosesê aştîye ganî rîbiameyîş zî mumkin bikero. Heqîqetî dir nêrê rî bi rî aştî zî mumkîn nîya. Çîyo bîn zî rewşa tepişteyê nêweşan o. Ganî komîsyonê îdare û taqîbkerdişî dest kerdişê keyfî ra vera bidê. Ganî dest kerdişê bêhuqûqî yê qeyûman vera bidê. Averşîyayîşê prosesî girêdayê îradeyê çareserî û aştîye yo.”