Qedexeyê tebervejîyayîşî ra ver bi waştişê aştîye 2025-12-15 11:16:45   Neslîhan Kardaş   ŞIRNEX - Zeycan Taşkin ke qedexeyê vejîyayîşê teberî de mêrdeyê xo vînî kerde û bi 4 tutanê xo 10 serrî yo têkoşînê cuye dana wina va: “Ma aştî wazenê. Mi mêrdeyê xo vînî kerd. Ma dejê girdî ciwîyayî. Wa kesê bînî nê dejî nêciwîyê.”   Cizîrê Şirnexî de 14ê kanûna 2015ine de qedexeyê vejîyayîşê teberî ame îlankerden û demê qedexeyî de bi seyan kesî ameyî qetilkerdene. Rêça şerrî yê bajarî hema domîyeno. Keyeyê ke tutanê xo vînî kerdî, bi seyan tutê bêdayî û bêbabî mendê est ê. Cizîr de her kes bi dejêko kûr ciwîyeno.   Zeycan Taşkin qedexeyan de mêrdeyê xo Cabbar Taşkin vînî kena. Zeycan Taşkin dimayê mêrdeyê xo vînî kena bi tutanê xo yê ke tewr gird 15 serre û tewr qij 9 serrî bîyêne têkoşînê cuye dana.   Zeycan Taşkin dîyar kerd ke semedê zordarîyan nêeşkena fotografê mêrdeyê xo zî keyeyê xo de daleqno û prosesê qedexeyî ajansê ma rê qal kerd.   ‘Mi vengê hewarî şinawit la nêeşkaya şîrî’   Zeycan Taşkin dîyar kerd ke mêrdeyê xo Cabbar Taşkin qedexeyan de vînî kerda û va: “Mêrdeyê mi semedê şîyayîşê tuwaletî keye ra vejîya û o dem gule ame eştene. Vengê qîrînê ey ame. Mi hewara ey şinawit la semedê guleyî ke ameyîne eştene nêeşkaya şîrî verê ey. Ez tersa wa. Mi va, eke ez zî bimirî do tutê mi tenya bimanê. Dimayê nê ez bi seatan vinderta. Saete 9-10ê şewe bî. Ez ver bi ê hetî şîya. Mêrdeyê mi erdî ser o bi. La mi fehm nêkerd çi qewimîyayo. Mi çimê xo akerd ez keye de ya. Serê sibayî ez şîya ke mêrdeyê xo bivînî. Ez şîya la uca de nêbî. Saete dorê 9î bî. Mi zanayîne cenaze berdê keyeyê şînî. Mi lajê xo yê 10 serrî girewt û ez şîya keyeyê şînî. La şar nêvarda ke ez bikewa zere. La ez û lajê xo kewtî zere. Cenaze mase ser o bî. Mi ewil va belkî birîndar o. Lajê mi qij bî tersayîne, ez zî tersaya. Mi va, ‘Hasan lajê mi babîyê to kiştê.’ Hasan bi qîrîn uca ra vejîya. Ez zî dimayê lajê xo şîya. Mi lajê xo girewt û ma şî keye. Cenaze di rojî keyeyê şînî de mende.”   ‘Ez û di tutê xo tenya mendî’   Zeycan Taşkin dîyar kerd ke tutê aye yê 14 û 15 serre semedê şuxulîyayîşî şîbî bajarêk bîn û va: “Ma nêeşkayîne êdî keyeyê xo de rakewê. Semedo ke ez û di tutê xo yê qij mendibî. Vistewreyê mi zî şibi keyeyê lajê xo yê bînî. Ez tenya mendebîya, merdimanê ma ez zî berda keyeya vistewreyê mi.”   ‘Dimayê mêrdeyê mi ma zaf zehmetî ant’   Zeycan Taşkin va: “Dimayê mêrdeyê mi ma zaf zor û zehmetî ant. Ma rezîlî dî. Ma vêşanî dî. Ma hamnanî şinê fistiqan kom kenê. Mêrdeyê mi ra tu çî nêmend. Keyeyê mêrdeyê mi hetkarîya mi nêkerd. Tu çî nêda mi. Ez bi sereyê xo şuxulîyena. La êdî ez zî nêweş a. Ez nêweşa şekir, tansîyon û kolestrolî ya. Ez zehmetîyan ancena.”   ‘Wa kesê bînî nê dejî nêciwîyê’   Zeycan Taşkin peynîya qiseykerdişê xo de bale ant ser prosesî û va: “Ma aştî wazenê. Ma nêwazenê kes bimiro. Mi mêrdeyê xo vînî kerd. Ez dejê girdî ciwîyaya. Wa kesê bînî nê dejî nêciwîyê. Wa kezeba dayîkan nêveşîyo.”