ZIMANGER ame akerdiş: Ma her cayî de kurdkî qisey bikerê 2025-12-17 10:37:20   Evîn Çîftçî   RIHA - Cinîyê ke tewrê awankerdişê ZIMANGERî bîyî wina vatî: “Ganî kurdkî bibo wayîrê statuyê xo û perwerde de bibo ziwanê fermî. No waştişêko keyfî nîyo, no ferz o.”   Zextê ziwanê kurdkî ser o seserran bi hawayêko sîstematîk dewam kenê. Zextê kurdkî ser o sey polîtîkayê dewlete dewam kerd. Awankerdişê komare ra heta nika nê polîtîkayî her tim giranêr bîyê. Pêwa nê, şarê kurdî têkoşînê ciwîyayîşê ziwanê xo kenê. Bi taybetî dayîkî na babete de rolêko muhîm gênê û ziwan nesl bi nesl heta ewro dayê ciwîyayîş. Riha de rojê vîyarte de ZIMANGER ame awankerdiş. No yew mîsalêko tewr rojeve yê nê têkoşînî yo.   Cinîyê ke tewrê ZIMANGERî bîyî derheqê polîtîkayanê asîmîlasyonî de ajansê ma rê qisey kerdî.   ‘Ziwanê ma nasnameyê bîyayîşê ma yo’   Salîha Şîmşek dîyar kerd ke semedê ziwanê kurdkî bibo ziwanê fermî ganî xebate zêde bêrê kerdiş û va: “Ziwan nasnameyê bîyayîşê ma yo. Vernîya her çî ganî merdim wayîrê ziwanê xo vecîyo. Ma wazenê sazgehê ziwanî her cayê Kurdistanî de bêrê awankerdiş. Merdim bi ziwanê xo yeno zanayîş. Semedê averşîyayîşê ziwanî perwerde şert o.”   ‘No waştiş nîyo, no ferz o’   Aktîvîsta TJAyî Başak Saridal zî vengdayîşê wayîrvecîyayîşê ziwanî kerde û wina qal kerd: “Ganî kurdkî bibo ziwanê fermî. No waştişêko keyfî nîyo. No ferz o. Bi mîlyonan kurdî dibistanan de perwerde gênê. Labelê bi ziwanê xo nê, bi ziwanêko bîn gênê. No zî rayîrê qelsî akeno û sernêkewenê. Ma hemverê polîtîkayanê asîmîlasyonî eşkenê sazgehê xo her cayî de abikerê. Her kes eşkeno bêro ZIMANGER û perwerde bigîro.”   ‘Ganî şarê kurdî bi ziwanê xo qisey bikero’   Hemsereka Komeleya Kultur û Piştidayîşê Keyeyanê Merdimê Xo Vînî Kerdê (KATDER) Makbule Yavuzer zî dîyar kerd ke ganî prosesê aştîye de kurdkî wayîrê statuyê xo bibo û wina va: “Ma wazenê tutê ma kurdkî qisey bikerê. Ziwanê ma nasnameyê ma yo. Ziwanê ma çin bo ma zî çin ê. Tutê ma ameyoxê ma yê. Ma prosesêko aştîye de yê. Ganî waştişê ma bêrê dîyayene.”