‘Semedê cuye û ruhêk azadî yewîye’ 2026-04-04 10:34:43   Neslîhan Kardaş   ŞIRNEX - Sîyasetmedaran derheqê yewîya kurdî de ercnayîş kerdî û vengdayîşê yewîye ya Rayberê Şarê Kurdî Abdullah Ocalanî ard vîr û vatî ke semedê cuyêka azade yewîye muhîm a.   Cigêrayîşê yewîye mîyanê têkoşînê tarîxî yê şarê kurdî de, bi hêrişanê 6ê çeleyî yê hemverê Helebî pê ameyî dir her demî ra zêde kûr bî. Qelsîyê komelî, kulturî û sîyasîyê ke parçebîyayîş viraştî, hewcedarîya zemînê piştîdayîşî û îradeyê hembeşî hîna zêde vet orte û yewîya kurdî tena sey hedefêk sîyasî nîyo, eynî wextî de sey hewcedarîyêka esasî ya ameyoxê şarî vejîyeno vernî. Nê prosesî ke averşîyayîşê herême giranêr benê, hem têkoşînê heqî hem zî çareserîyanê manadar sey mifteyê çareserîye yenê dîyayîş. Hêrişanê hemverê Helebî dir her çar perçeyê Kurdistanî de sloganê “yew o yew o yew o şarê kurdî yew o” berz bî.   Sîyasetmedaran Şirnexî de derheqê muhîmîya yewîya kurdî de ercnayîş kerdî.   ‘Semedê şarê kurdî yewîye her hetî de muhîm a’   Hemserekaya Partîya Têduştî û Demokrasîyê Şaran (DEM Partî) ya Hezexî Songul Erden va ke yewîya şarê kurdî her hetî de muhîm a û wina va: “Eynî wextî de yewîya şarê kurdî semedê dinya zî muhîm a. Demê hêrişanê xurtî yê hemverê Rojava de her çar perçeyê Kurdistanî de şarê kurdî lingan ser bî û yewîya xo nîşan da. Bi taybetî Botan de zî kurdî yewîya xo nîşan dayî. 7 ra heta 70yî her kes ser lingan bî. Dima ra mesajê ke serekî 27ê sibatî şirawit dir şarê kurdî hîna zêde xurt bî. Şarê kurdî dîyar kerd ke ê girêdayeyê serekê xo yê û do yewîya xo hîna zêde xurt bikerê. Semedê şarê kurdî yewîye her hetî de muhîm a. Mesûd Barzanî nê prosesî de rolê xo rind kay kerd. Yewîya kurdî xurt bî.”   ‘Yew fehm, yew beden, yew ruh’   Hemsereka DEM Partîyî ya Şirnexî Taybet Bîlgî zî va ke yewîya şarê kurdî, semedê xurtkerdişê hevalbendîye û semedê îdarekardişêk pîya muhîm a û wina va: “Her çar perçeyê Kurdistanî de yewîya kurdan semedê cuyêk azade, ruh û îdarekerdişêk azade muhîm a. Hevalbendîya kurdan wayîrvecîyayîşê ziwan, kultur, nasname û bîyayîşî ya. Prosesê peyêne de ame fahmkerdiş ke hevalbendîya kurdan xurt bîya. Tîya ra dima zî do xurt bibo. Do semedê azadîyêk manadar xurt bibo. Tu reng, ziwan, dîn ganî nêro çinkerdiş. Semedê nê yewîya kurdî muhîm a. Hevalbendîya şarê kurdî muhîm a. Semedê cuyêk azade lazim a. Ganî wayîrê vengdayîşê Rayberê Şarê Kurdî bivejîyo.“