‘Semedê azadî ma do biherikîyê Gemlîk’ 2026-04-11 09:16:47   STENBOL - Cinîyan semedê rayîrşîyayîşê Gemlîkî yê ke semedê azadîya fîzîkî ya Rayberê Şarê Kurdî Abdullah Ocalanî pê yeno venga tewrbîyayîşî kerdî û vatî: “Waştişê ma yo esasî azadî ya. Ma bibê milyon biherikîyê Gemlîkî. Aştî semedê her kesî hewcedarî ya. Wa gonî vindero û her kes wezîfeyê xo bica bîyaro.”   Têgêrayîşê Cinîyanê Azadan (TJA), semedê azadîya Rayberê Şarê Kurdî Abdullah Ocalanî bi sloganê “Dem demê azadîya cinî û azadîya Rayber Apo yo” 19ê nîsane de ver bi Gemlîkî yê Bursayî de rayîrşîyayîş organîze kena. Zafê bajaran de amadekerdişê rayîrşîyayîşî yenê kerdiş û semedê tewrbîyayîşî veng yeno dayîş.   Rayîrşîyayîşî de waştişê şiknayîşê tecrîdê Abdullah Ocalan ser, pêkerdişê şertê azad û awankerdişê cimatê demokratîkî do bêrê ziwan. Cinîyê ke do tewrê rayîrşîyayîşî bibê ajansê ma rê qisey kerdî.   TJA: Ma wazenê derûdorêk azad de bêrê têhet   Çalakîkera TJAyî Ozlem Soyler va ke armancê rayîrşîyayîşî no yo ke derûdorêk azad de Abdullah Ocalan dir bêrê têhet û bibê vengê azadîye. Ozlem Soyler wina va: “Rayîrşîyayîş eynî wextî de bi armancê îtîraz û vurîyayîşî yeno kerdiş. Sîstemêk ke hewcedarîya ma bica nêano est o. Ma hedef kenê ke lingê demokratîkbîyayîşî xurt bikerê. Cinî merkezê prosesî yê. Nê welatî de tarîxêk xurtî yê sîyasetê cinîyan est o. Ma pîya rayîr ra şinê. Prosesêk ke cinî ci de çin bê qels o. Ma cinî şer nêwazenê, aştî wazenê. Ma wazenê îradeyê xo îradeyê Birêz Ocalan dir yew bikerê. Ma venga tewrbîyayîşê rayîrşîyayîşî heme cinîyan rê danê.”   HDK: Ma do cimatê demokratîkî awan bikerê   Koordinasyonê Meclîsê Cinîyanê Kongreya Demokratîkî ya Şaran (HDK) ra Yagmur Yurtsever zî bale ant rolê cinîyan têkoşînê komelî ser û wina ard ziwan: “Cinîyan ewro zî rolê prosesê cimatê demokratîkî bi hawayêk xurt girewtî xo ser. Rayîrşîyayîş eynî wextî de îfadeyê sîyasî yo. Rolê serkêşî yê cinîyan ê rayîrşîyayîşê Gemlîkî de îfadeyê rêxistinkerdeyî yo. Ganî tecrîdê Birêz Ocalanî ser o bêro wedaritiş. Pêwa prosesê muzakereyî tecrîdê Birêz Ocalan ser o problemêk cidî yo. Ma cinî nê rind vînenê. Cinî do cimatê demokratîkî awan bikerê.”   MATUHAYDER: Waştişê yewine azadî ya   Hemsereka Komeleya Hetkarîya Keyeyê Tepişteyan ê Marmara (MATUHAYDER) Nurten Karagoz zî va ke sebebê esasî yê rayîrşîyayîşî azadîya Abdullah Ocalanî yo. Nurten Karagoz wina dewam kerd: “Ganî Birêz Ocalan azad bibo. Ganî şertê azad de muzakere bêro kerdiş. Ma cinî wazenê ke Birêz Ocalan şertê azad de prosesê muzakereyî bidomno.”     Dayîkanê Aştîye: Ma bibê milyon û biherikê   Dayîka Aştîye Sultan Bozkurt zî bale ant muhîmîya rayîrşîyayîşê Gemlîkî û wina dewam kerd: “Rayîrşîyayîşê Gemlîkî tena emser nêame plankerdîş. Serrê vîyarteyî de zî rayîrşîyayîşî pê ameyî. La ma zordarî û astengîyan dir rî bi rî mendî. Serra 2000ine de zî zaf rayîrşîyayîşî ameyî kerdiş. Manayêke tarîxî yê rayîrşîyayîşê Gemlîkî est o. Tewrbîyayîşêk girseyî muhîm o. Rayîrşîyayîşî de waştişê azadîya Abdullah Ocalan do bêro berzkerdiş. Aştî bi azadîya Birêz Ocalanî mumkin a. Ocalan azad nêbo şarê kurdî zî azad nêbeno. Ez venga tewrbîyayîşê rayîrşîyayîşî heme cinîyan rê kena. Ganî na gonî vindarîyo û semedê nê her kes wezîfeyê xo bica bîyaro.”