STENBOL - Heyetê DÎSK’î tacegul Meydanê Taksîmî ke ameyo qedexekerdiş û nika abluqayê polîsan de yo, da ro.

 

Heyetê Konfedarasyonê Sendîkayê Karkeranê Şorişgiran (DÎSK) tacegul da Meydanê Taksîmî ke pîrozbayîya 1ê Gulane Roşanê Karker û Kedkaran rê ameyo qedexekerdiş û nika abluqayê polîsan de yo. 

 

Heyetê DÎSK’î ke Sereka Pêroyî Arzu Çerkezoglû zî mîyan de bî, ameyî vernîya Konsolosxaneyê Almanan yê Taksîmî. Heyetê DÎSK’î, tîya de bi slogan û çepikan ver bi Meydanê Taksîmî de rayîr ra şîyî. Heyetê DÎSK’î, sloganê “Biciwîyo 1ê Gulane”, “Bi tena sereyê xo xelisyayîş çin o yan pîya yan tu kes ma ra” û “Qeyûmî do şêrê ma do bimanê” berz kerdî û tacegul dayî verê anitî. 

 

Arzu Çerkezoglû tîya de qiseykerdişêk kilm kerd û venga tewrbîyayîşê mitîngê Kadikoyî her kesî rê kerd. Arzu Çerkezoglû va ke Meydanê Taksîmî meydanê 1ê Gulane yo û wina va: “Bi serran semedê azadîya 1ê Gulanê û Taksîmî ma têkoşîn kerd. Her cayê dinya de karker û kedkarî ke ça dîyar bikerê, 1ê Gulane uca de pîroz kenê. La welatê ma de bi serran o Meydanê 1ê Gulane qedexe yo. La ancî zî ma do Taksîmî xelas bikerê.  

 

Pêwa pêro zextan zî ma do waştişê aştî û edaletî yê komelî pê bîyarê. Do kedkar, cinî û ciwanî her kuçeyanê Tirkîya de biherikîyê meydanê 1ê Gulane. Do 1ê Gulane serbikewo, edalet serbikewo, ma do pîya serbikewê. Wexto ke ma kewtî ser do demokrasî û edalet zî serkewte bê.”