Elfazi Toral 

 

STENBOL - Sereka Pêroyî ya Sendîkaya Karkerê Keyeyî ya Îmece Mînîre Înal, dîyar kerd ke ganî Peyamana Karî ya ILO 189 bêro îmzakerdiş û va, têkoşînê cinîyan dir kenê roj bi roje pîl bena.

 

Cinîyê karkerê keyeyî xeylêk heqê xo ra bêpar yenê şuxilnayîş. Karkerê keyeyî xeylê rey wexto ke şuxilênê, paceyê keyeyan ra kewenê û dinyaya xo bedelnenê. Mînîre Înal zî yewe nê karkeran ra bîye.  Mînîre Înal 2009ine de wexto ke paceyê keyeyêk pak kerdêne, qatê hîrêne ra kewte û hîrê aşmî nêweşxane de amî dermankerdiş. Bi desine rey amî amelîyatkerdiş. Mînîre Înal Antalya de ciwîyayîne û semedê şertê ekononî karê pakitîya keyeyan kerdêne. Dimayê qeza Komeleya Karkeranê Keyeyî nas kena. 19ê kanûna 2013ine de Sendîkaya Karkerê Keyeyê Îmece îlan kena. Bi serran o  sendîka de cinîyanê karkeranê keyeyî dir xeta têkoşînî pîl kena.

 

Mînîre Înal derheqê cuya xo de wina va: “Roja ke mi dest bi nê karî kerd, mi semedê cinîyanê karkeranê keyeyî têkoşîn kerd. Ma Îmece bi serran verê Stenbol de bi hûmarêke zaf kêmî awan kerd. Ewilî komeleyêke amebî awankerdiş. Ez tewrê ci bîya. Ez qatê hîrêne ra kewta. Mi Komeleya Paştdayîşê Cinîyan Îmece nas kerd. Semedê qeza problemê mi ê weşîye estbî. Demêk derg nêweşxane de menda. Komeleya Îmece mi reyde eleqeder bî. Ma pîya dest bi têkoşînî kerd. Ma cinîyan dir 19ê kanûna 2013ine de Sendîkaya Karkeranê Keyeyî ya Îmce awan kerd.”

 

‘Ma pîya têkoşîn kenê’

 

Mînîre Înal wina va: “Semedo ke sendîka xo biresno girseyanê pîlî, ganî pêro kesê bi sîgorte yan zî bê sîgorta paştdayîş bidê sendîka. Semedê karkeranê keyeyan biresê heqê xo yê komelî, ma sendîka awan kerd. Tirkîya de mîlyonêk ra zêde karkerê keyeyî est ê. Nê semedî ra zî se ra 90î zêdeyêr cinî yê. Se ra 80 zî bêsîgorta yê. Asayîşê teqawîtbîyayîşî û weşîye çin o. Tezmînat çin o. Saete û demê karê ma çin o. Betlane çin o. Ma karkerê otele yan zî fabrîqa nîyê. Ganî semedê heqî ma xo bi rêxistin bikerê.”

 

‘Ganî peymana ILO C 189 bêro îmzekerdiş’

 

Mînîre Înal dîyar kerd ke peyamana ILO C 189 xeylêk welatan de ameya îmzekerdiş û va: “Tirkîya hema îmza nêkerda, hema paweyê çîya? Cinî ke şinê pakitîya keyeyan, binê tehluke de yê. Rojê vîyarte de cinîyêke wexto ke pakitî kerdêne kewte û dinyaya xo bedelnaye. Ma nêwazenê bimirê. Ganî Peymana ILO bêro îmzakerdiş û ganî bikewê mîyanê têgêrayîşî. Nê welatî de keda cinîyan yena binpaykerdiş. Erjê merdiman çin o. Ma ILO C 189 de bi israr ê. Ganî bêro îmzakerdiş. No heqo tewr xozayî yo. Ma do bipawê. Vindertiş çin o, ma do têkoşîn dewam bikerê. Ganî ma bibê yew.”