MERSÎN - Cinîyê ke qeyikê masegiran de şuxilênê bale antî tesîrê qerarê ke hetê sîyasetmedaran ra krîzê ekonomî ser o ameyê girewtiş û dîyar kerdî ke zehmetîyê ke ê ciwîyenê tewr kûr benê. Înan qetî kerd ke têkoşînê semedê debara cuye êdî nîno tehemûlkerdiş.

 

Krîzê ekonomî ke Tirkîya de her roje kûr beno, cuya cinîyan ser û bin keno. Hetêk ra karê keyeyî, heto bîn ra têkoşînê semedê debara cuye... Tesîrê krîzî tena cêban de nê, eynî wextî de metbex, sofreyan ser û heta werdê tutan de zî yeno hîskerdiş. No bar ke bi polîtîkayê şerî yê hukmatî dir giran beno, beno barêk giran milê cinîyan ser o. Cinîyê ke qeyikê masegiran yê qezaya Akdenîzî de şuxilênê, bi neqlkerdişê zehmetîyê ekonomî yê ke ê ciwîyenê bi vatişê xo rîyê nêvînayeyê nê krîzê ekonomî verê çiman de fînenê ra.

 

'Dewijî, citkarî perîşan ê û îdarekarî xirab o'

 

Fatma Bulbul, wina qalê krîzî kerd, "Ma şinê bazar, çend çîyê qijan gênê; ma vînenê ke pereyêk zêde semedê nê ameyo xerckerdiş. Ez teqawid bîya la ez mecbûr menda ke tîya ancî bişuxilî. Ez çares hezar lîra meaş gêna la gama ke şima bi nê perî şinê bazar, nîmeyê pereyî şino. Rewşe zaf xirab a. Ez nêzana do senî çareser bibo. Ganî welat de berardiş bibo. Dewijî û citkarî perîşan bîyê, îdarekarî qels o. Kargehê ke berardiş kerdêne ameyê rotiş. Qerarê ke hetê siyasetmedaran ra ameyê girewtiş, rasterast tesîr krîzê ekonomî ser o kenê. Ganî cinî bêrê îstihdamkerdiş, citkar û meslegî rê ganî paştdayîş bêro dayîş. Ganî sektorê tekstîlî bêro xurtkerdiş. Karkerê tekstîlî rewşêke zaf xidar de yê. Eke ma nêbê komelêk ke berarde keno, ma do na rewşe ra xirabêr rî bi rî bimanê.”

 

'Ma nêwazenê her roje bi zêdebîyayîşê vayî dir rî bi rî bimanê'

 

Meliha Şekerer, dîyar kerd ke aye 15 serrî yo şuxilêna û va, dimayê zewacî dest bi xebate kerda ke aye hetê ekonomî ra mêrdeyê xo rê girêdaye nêmano. Meliha Şekerer, dîyar kerd ke şert û mercê xebate yê cinîyan asayî nîyo û va, ê xeylê rey heqê keda xo nêgînê. Melîha Şeker dîyar kerd ke merdimî goreyê cêbê xo têgêrenê û ê zî hewl danê ke wextê girewtişî de erjan bigîrê. Meliha Şekerer zêdebîyayîşê vayîye ya domdare rê gerre kerd û va, "Heta vayîya penêrî zî roj bi roje vuryena. Ma nêwazenê her roje zêdebîyayîşê vayîyê neweyan dir rî bi rî bimanê. Ma wazenê ke nê zêdebîyayîşî peynî bibê."