AMED - Qezaya Sûrî ya Amedî de cinîya bi nameyê Hêlîn Erena digane hetê Siyabend Şeker ke bi marayê dînî aye dir zewicnayebî ra amî kiştiş. Siyabend Şekero ke badê hedîse rema, ame destbendkerdiş.

 

Cinîya bi nameyê Hêlîn Eren (19) ke digane bî, taxa Çîft Kapi ya qezaya Sûrî ya Amedî de hetê Siyabend Şeker (20) ke aye dir bi marayê dînî zewicnayebi, bi çeke amî kiştiş. Ame zanayîş ke mabêne Hêlîn Eren û Siyabend Şekerî de semedê sebebêk nêdîyar munaqeşe vejîya. Demê munaqeşeyî de Siyabend Şeker bi çeke vera dano Hêlîn Erene û aye bi giranî birîndar keno. Serê agahdarkerdişî de kesê derûdorî tîmê weşîye û polîsan sewqê cayê hedîse ame kerdiş. Dimayê mudaxileyê ewilî Hêlîn Eren bi ambûlanse wedarnayî Nêweşxaneyê Dewlete yê Selahattîn Eyubiyî. Hêlîn Eren pêwa pêro mudaxileyan uca de dinyaya xo bedelnaye.

 

Siyabend Şeker ke dimayê hedîse rema hetê tîmê polîsan ra ame vînayîş û destbendkerdiş. Kar û barê îfadeyî yê Siyabend Şekerî yê midûrîyetê polîsan dewam keno. Ame zanayîş ke cenazeya Hêlîn Erene Goristanê Çîftehavûzlar ê qezaya Sûrî de ameya definkerdiş.