Elfazî Toral

 

STENBOL - Cinîyê ke bi serkêşîya cinîyanê Partîya DEMî ya Sancaktepeyî yenê têhet, bi perwerdeyê erbane hem xo rêxistin kenê û hem zî têkoşînê cinîyan gird kenê.

 

Dimayê mesajê Rayberê Şarê Kurd Abdullah Ocalan ke 8ê Adare de cinîyan rê şirawit, cinîyê Partîya DEMî yê Sancaktepeyî bi nameyê Amargî koma erbane viraştî û bi na kome hem têkoşînê kulturî û hem cimatî domnenê. Cinîyê ke bi sloganê ‘cinî tena nîyê’ yenê têhet bi erbane têkoşînê cinîyan û azadîye xurt kenê.

 

Armanc awankerdişê cayê kulturî yo

 

Koma ke 8 aşmî yo awan bîya, bi perwerdeyê ke gênê eynî wextî de berardiş û xurtbîyayîşê cinîyan armanc kenê. Cinî pêwa muzîk hemverê şîdetî piştîdayîş, hişmendî û cayêko kulturî yê hempar awan kenê.

 

Bi Amargî agêrayîşê xo

 

Hemsereka Partîya DEMî ya Sancaktepeyî Ayşe Çîftçî ke eynî demî de mîyanê koma Amargî de ca gêna da zanayîş ke sey cinîyê Sancaktepeyî hem semedê piştîdayîşî hem zî semedê awankerdişê komunê kulturî yenê têhet. Ayşe Çîftçî nê çî ardî ziwan: “Armancê ma tena musnayîşê erbane nîyo. Demo ke ma erbane musenê ma eynî wextî de rêxistinbîyayîş, hişmendî û têkoşînê cinîyan zî pîl kenê. Ma bi Amargî gêrenê xo. Nameyê Amargî zî yeno manaya A azadî û MA zî dayîke yanî xo bigêre. Ma bi nê nameyî koma xo da ro.”

 

Berardişê pîya

 

Ayşe Çîftçî wina peynî ard: “Perwerdeyê erbane tena musnayîşê muzîkî nîyo. Eynî wextî de ma berardiş û xurtbîyayîş zî armanc kenê. Pêwa muzîkî hemverê şîdetî de piştîdayîş û hişmendî awan kenê. Ma komunê kulturî awan kenê û hişmendî û rêxistinbîyayîş hedef kenê. Ma venga heme cinîyan kenê ke wayîrê prosesî vecîyê û piştîdayîş bidê prosesî.”