WAN - Sekreteraya Însîyatîfê Yewîya Demokratîkî Dîba Keskîn va ke semedê awankerdişê cimatê demokratîkî yewîya neteweyî muhîm a û va: “Ganî şarê kurdî yê ke çar welatan de ameyo parekerdiş yew bibê. Wedaritişê sînorê dewletan zehmet bibo zî, ganî sînorê mîyanê zerrî û hişan de bêrê wedaritiş. O wext do prosesê yewîya kurdan vernê de biherikîyo û bireso armancê xo.”

 

Prosesê Aştî û Cimatê Demokratîk yew serrî yo dewam keno û yew vengdayîşanê ke yenê kerdiş pêkerdişê yewîya neteweyî yo. Yeno dîyarkerdiş ke awankerdişê cimatê demokratîkî de yewîya neteweyî muhîm a û semedê ke 100 serrêk bîn ê înkarkerdişî nêbo ganî yewîye pê bêro. Şarî nê waştişê xo bi hawayêk xurt ano ziwan û xebatanê xo nê hetî de domnenê. Newroza 2026ine Newroza yewîya neteweyî ame îlankerdîş û Platformê Yewîya Cinîyanê Kurdî zî konferans ca ard û va ke ganî cinî rolê serkêşî yewîye de kay bikerê. Tewr peyêne Başûrê Kurdistanî de bi sloganê “Yew o yew o, şarê kurdî yew o” projeya yewîya neteweyî dest pêkerd. Sekreteraya Însîyatîfê Yewîya Demokratîkî Dîba Keskîn derheqê muhîmîya yewîya neteweyî ya ke waştişêk xurt a de ercnayîş kerd.

 

‘Yewîye ancax bi yewîya şaran mumkin a’

 

Dîba Keskîn eşkera kerd ke dimayê şerê ke pê ameyî, sînorê neweyî dir Kurdistan çar perçeyan de ameye cîyakerdiş û hêzê hegemonî semedê berjewendîyê xo hewl dayî qederê kurdan dîyar bikerê. Dîba Keskîn wina va: “Dimayê 100 serrî hema zî şerê hegemonan dewam keno. Wazenê sînoran ancî yew rey bivurnê. Eke yewîya şarî xurt bo do nê prosesî de semedê înan destkewtîşêk bibo. Nê prosesî de ganî şarê kurdî yewîya xo pê bîyaro. Ganî şarê kurdî yê her perçeyî yew bibê. Wedaritişê sînorê dewletan zehmet bibo zî wedaritişê sînorê hişan û zerriyan mumkin o. Ganî kurdî yewîya xo pê bîyarê. Ma rê yewîye lazim a. Qasê nanî û awî muhîm a. Kurdî yew nêbê do yewbînan rê xerîb bibê. Rayberê şarê kurdî zî vano eke na rey yewîye pê nêro do yewbînan rê xerîb bibê. 100 serrî wina vîyart, wa 100 serrê bînan zî wina nêvîyarê. Wa tutê ma dej nêancê.”

 

‘Do yewîya kurdan proses aver bero û biresno netîce’

 

Dîba Keskîn va ke roja ke însîyatîf ameyo awankerdiş ra heta nika semedê cimatêk demokratîk û azade têkoşîn kenê û wina dewam kerd: “Eynî wextî de bi sloganê ‘yew o yew o, şarê kurdî yew o’ nêzdîyê 200 kesî piştîdayîş dayî projeya yewîya neteweyî. Prosesê Aştî û Cimatê Demokratîk zî do bi yewîya neteweyî û têkoşînê şarî xurt bibo û bireso serkewtişî. Ganî qanûnî bivejê, meclîs bixebitîyo. Yewîya kurdî do prosesê çareserîye aver bero û bireso armanc.”