ÎZMÎR - Denîz Uslu vat eke tedbîrê lazîmî bêrê gîrewtene do vernîya şîdetê mêrdeyî bêro girewtene û vat: “Ganî Peymana Stenbolî reyna bikewo ciwîyayîş, derheqê cinsê cimatî de perwerdeyî semedê wezîfedaranê îstîmlakî bêro dayene.”

 

Qetilkerdişê cinîyan her şinê zêde benê û goreyê çeteleyê şîdetî yê JINNEWSî aşma hezîrane de 29 cinî ameyî qetilkerdiş û 14 cinî zî bi guman dinyaya xo bedelnayî. Pêwa ke cinî bi desine rey muracat kenê û qerarê dûrvistişî zî est o, sîstemetê pawitişî bi tesîr bica nîno. Cinîyî dîyar kenê ke bi sîstemetanê huqûqîyan yê bi tesîr û têkoşînê cinîyan şêno vernîya şîdet û qetilkerdişê cinîyan bêro girewtene.

 

‘Vernîya qetilkerdişê cinîyan nêgînê’ 

 

Paştdayîşê Morî ra Denîz Uslu da zanayene ke ganî sîstemetê huqûqî yê bi tesîr bikewê ciwîyayîş. Denîz Uslu dîyar kerd ke pêwa ke şêno verê qetilkerdişan bêro girewtene zî tu çîyêk nîno kerdene û vat: “Cinî rastê şîdetî yenê, gerre kenê. Qerarê pawitiş û dûrvistişî yenê girewtene; labelê nê qerarî bi tesîr nêyenê ca. Sîstemetê pawitişî yo sey kelepçeyê elektronîkî rind nînê kontrolkerdene. Polîtîkayê ke est ê pawitişê cinîyan de qels manenê. Wedaritişê Peymana Stenbolî tablo hîna giran kerd. Problem tenê îhmalkarî nêyo, estbîyayîşê fehmêk sîyasî yo. Nêyê ke nêşênê vernîya nê tabloyî bigîrê, vernîya ci nêgînê.”

 

‘Ganî pawitiş paştî bido kontrolê bi tesîr ê dewlete’

 

Denîz Uslu dîyar kerd ke zaf cinîyî pêwa ke bi desine rey gerre kenê zî yenê qetilkerdiş û wina dewam kerd: “Zaf rey qerarê pawitiş û dûrvistişî yenê girewtene. Labelê çi heyf sîstemetêk yê kontrolî bi tesîr çin o. Sîstemetê neqlkerdişî otomatîk û kelepçeyê elektronîkî bikewê dewre do vernîya qetilkerdişan bêro girewtene. Nêşêno bêro pawitene ke cinî her tim caardişê KADESî bixebitno. Nêşênê xo biresnê telefonan. Na xebate de babete tena prosedur nîya, heqê ciwîyayîşê cinîyan o.”

 

‘Cinîyê ke ziwanê înan tirkî nêyo problemê cîdîyan ciwîyenê’

 

Denîz Uslu ard ziwan ke xoresnayîşê huqûq û edaletî bi sînor o û zafê cinîyî heqê xo nêzanê, ê ke zanê zî prosesê qerekol û dozgerîye de rayîr û metodê lazîmî nêgînê. Denîz Uslu nê çîyî ardî ziwan: “Cinîyê ke tirkî nêzanê zî wareyê xoresnayîşê edaletî de probleman ciwîyenê. Semedo ke açarnayox çin o zafê rey netîceya ke telafîya înan çin a, vejîyenê werte. Ganî Peymana Stenbolî reyna bikewo ciwîyayîş. Ganî semedê wezîfedaranê îstîmlakî perwerdeyê cinsê cimatî bêro dayene û no perwerdeyî ferz bo. Ganî polîtîkayê ke heqê ciwîyayîşê cinîyan esas gênê bikewê ciwîyayîş.”