Neslîhan Kardaş

 

ŞIRNEX - Cinîyan derheqê azadîya fîzîkî ya Rayberê Şarê Kurdî Abdullah Ocalanî de ajansê ma rê qisey kerd û dîyar kerdî ke lazim o ke tecrîd peynî bibo û aştî bi azadîya Abdullah Ocalanî mumkin a.

 

Bi vengê Rayberê Şarê Kurdî Abdullah Ocalanî yê "Aştî û Cimatê Demokratîkî" ke 27ê sibata 2025ine de kerd, prosesêk dest pêkerd û no 20 aşmî yo dewam keno. Roja ke proses dest pêkerd hetê Rayberê Şarê Kurdî Abdullah Ocalan ra gamê somutî ameyî eştiş û averşîyayîşê peyêne zî no bî ke têgêrayîşî hêzanê xo yê sînorê Tirkîya ra heme antî, dima cû Zap ra Metîna ra zî xo antî. Bi nê gaman zî qerardarîya xo ya ke derbazbê sewîyeya sîyasetê demokratîkî mojnayî. Heto bîn de yew waştişê esasî yê prosesî azadîya fîzîkî ya Abdullah Ocalanî ya.

 

Cinîyê Botanî derheqê mesela de ajansê ma rê ercnayîş kerdî.

 

'Mifteyê aştîye Birêz Ocalan o'

 

Hemsereka Partîya Herêmanê Demokratîkî (DBP) ya Cizîrî Aynur Elçîoglu va ke no di serrî yo proses dewam keno û va: "Çarçeweya prosesî de ma zaf reyan şarî dir ameyî têhet. Şarî piştîdayîşê prosesî keno û vano dewlete gamanê somutî nêerzena. Hema zî semedê azadîya Birêz Ocalanî tu game nêameya eştiş. Heta Serek azad nêbo proses nêşeno biherikîyo. Şar dewlete ra bawer nêkeno. Mifteyê aştîye Birêz Ocalan o. Heta o azad nêbo, ma yew zî azad nîyê."

 

 

'Tecrîd hema zî dewam keno'

 

Hemsereka Partîya Têduştî û Demokrasîyê Şaran (DEM Partî) ya Hezexî Songul Erden zî dîyar kerd ke destpêkê prosesî ra heta nika Rayberê Şarê Kurdî Abdullah Ocalan zaf gamî eştî û wina dewam kerd: "Heta nika PKKyî zî zaf gamê muhîmî eştî. La hema zî dewlete tu çî nêkerd. Tecrîd, Rayberê Şarê Kurdî ser o dewam keno. Lazim o ke no tecrîd peynî bibo."

 

'Heta Abdullah Ocalan azad nêbo aştî zî mumkin nîya'

 

Dayîka Aştîye Nafiye Kurt zî wina va: "Lazim o ke tecrîdê Abdullah Ocalanî ser o peynî bibo. Lazim o ke berê zîndanan bêrê akerdiş. Ma şer nê, aştî wazenê. Ma azadîya serekê xo wazenê. Heta serekê ma azad nêbo ma zî azad nîyê. Bêazadîye aştî zî mumkin nîya. Her çî girêdayeyê azadîya serekê ma yo."

 

'Wa nasnameyê ma bêrê naskerdiş'

 

Dayîka Aştîye Hatîce Durmuş zî va, lazim o ke Abdullah Ocalan zî sey rayberê heme şaran azad bibo û wina qedêna: "Lazim o ke Abdullah Ocalan û heme tepiştê sîyasî azad bibê. Lazim o ke tepişteyê nêweşî bêrê veradayîş. Lazim o ke serekê ma azad bibo. Ma dewlete ra bawer nêkenê. Wa serekê ma azad bibo û nasnameyê ma bêro naskerdiş."