Gulistan Gulmuş

 

AMED - Cinîyê Sûra Amedî de ciwîyenê, hem hemverê feqîrî, hem zî hemverê şîdetê camêrdî de têkoşîn kenê. Cinîyan vatî, ê nêeşkenê debare bikerê û semedê cuya xo dewam bikerê lazimî bi paştdayîş est a.

 

Krîzê ekonomî roj bi roje giran beno û tesîrêk pîl cuye ser o keno. Bêşik yê tewr zêde tesîr benê cinî yê. Cinî hemverê şert û mercê cuye û krîzê ekonomî de têkoşîn kenê.

 

Adîle Îgne û Havva Denîz ke 35 serrî verê Sûra Amedî de bica bîyê dîyar kerdî ke hem emrê qijî de ameyê zewicnayîş û hem zî emrê qijî de berpirsyarîyê tutan girewtê.

 

Adîle Îgne kam a?

 

Adîle Îgne, kênaya mêrdeyê xo Dîlek Îgne dir taxa Dede Abdal ya Sûrî de ciwîyena. Adîle Îgne badê ke zewicêna hîrê rey digane manena la semedê problemê weşîye tutanê xo vînî kena. Mêrdeyê aye cinîyêke bîne dir zewicyeno la na cinî badê tute ana dinya, dinyaya xo bedelnena. Dimayê ke dayîka Dîlek Îgne dinyaya xo bedelnena, Adîle Îgne aye rê dayîkîye kena.

 

Adîle Îgne seranserê zewacî de hetê camêrdî ra şîdet vînena. Badê ke mêrde mireno, Dîlek Îgne dir ciwîyena û têkoşînê cuye dana.

 

‘Keyeyêk di ode de ciwîyenê’

 

Adîle Îgne wina va: “Ma kîra de yê. Semedo ke ewnîyena Dîleke ra 300 TL danê mi. 25 serrî verê, babîyê aye merd. 35 serrî yo ez ewnîyena. Ez û aye tena ciwîyenê. Hîrê serrî ra ez ewnîyena. Aşme ra 3 hezar kîra dana. Maaşê teqawîtbîyayîşî gêna la qîm nêkeno. Mêrdeyê mi şîdet mi rê kerdêne. Mi cuyêke wina ciwîya.”

 

‘Meaşê ma qîm nêkeno’

 

Havva Denîz zî dîyar kerd ke seranserê cuya xo de  têkoşîn kerda û va: “35 serrî verê dewa ra ameya.  11 tutê mi virazîyayî. Mi bi feqîrî înan pîl kerd. Ma şîne erdan ser. Her mewsimî ma biameyîne, mi yew zewicnayîne. Mêrdeyê mi 10 serrî verê merd. Meaşê ey teqawîtbîyayîşê 9 hezar danê mi. La nê qêmî ma nêkenê. Veyva min a qije mi dir a. Lajê mi firine de xebityeno. Pereyê ma gênê qîmê çîyêk nêkeno.”