Melîke Aydin

 

ÎZMÎR - Hetê Meclîsê Weşîye ya HDK'yî Doktor Ayşe Ozdamar va ke her tewir tiryakbîyayîş girêdayê tedayê komelkî yo û taktîkê şerî yo. Ayşe Ozdamar va ke do têkoşînê hemverê tiryakî tu wext rojeve ra nêfînê.

 

Meclîsê Weşîye yê Kongreya Demokratîke ya Şaran (HDK) aşmanê nîsane û gulane de Hatay, Îzmîr û Stenbol de 'komxebata tiryakî û têkoşînî' kerd. Hemverfeka Meclîsê HDK'yî ya Îzmîrî Doktor Ayşe Ozdamar derheqê na babete de qisey kerd.

 

'Tiryakbîyayîş problemêko global o'

 

Ayşe Ozdamar îfade kerd ke hetê tiryakbîyayîşê bigîrî heta yê xumara dîjîtalî nêweşîyêk o û wina va: "Kesî hetê biyolojîk û psîkolojîkî ra çin keno. Kesî girêdayê yew çîyêk benê. Serranê peyênan de tiryakbîyayîşê dîjîtalî zêde bî. No problemêko global o. Kîmyasalê sey tîryakî û alkol hetê verên ra est ê. La tu wext hende nêbî problemêk ke komelî çin bikero. No bi problemanê modernîteya kapîtalîstî peyda bîyayene. Piyasa û sektorê tiryakbîyayîşê est ê. Bazarêko gird ê ciwanan est o. Kapîtalîzm hetê nê karî ra faydeyan gêno."

 

'Tiryakbîyayîş hacetê polîtîkaya şerê taybetî ya'

 

Ayşe Ozdamar dewam kerd û va ke dewlete tiryakî sey polîtîkaya şerê taybetî şuxilnena û wina va: "Bi taybetî bajranê kurdan de no bi destê dewlete yeno kerdene. Seba ciwananê tiryakî çîyêk nêfikrenê. Seba ke a madeye bivînê muracatê her çî kenê. Dewlete seba ke vernî bigîro bi tedbîrê polistî gêno la seba hûmara şuxilnayîşê hişbirê zêde bena, no feyde nêkeno. Dewlete berpirsîyarî kena serê milê dayîk û babîyan."

 

'Şuxilnayîşê hişbirê zî zêde beno'

 

Ayşe Ozdamar dewam de wina va: "Her ke şert û mercê aştîye zêde bibê, do tiryakî zî kêm bibo. Zêdebîyayîşê tedayê komelkî şuxilnayîşê tiryakî zî zêde keno. Eke problemê komelkî çareser bibê do şuxilnayîşê tiryakî zî kêm bibo. Bi taybetî dayeyê derheqê cinîyan de bişik o. Cinî keye de cayê taybetî de çi kenê ma nêzanê. Nêyenê dîyene. Camêrdî tîryakî bişuxilnê, bi rehetî îfade kenê. Nêbeno problemê namûsî. La cinîyan rê no sey problemê ehlaqî yeno dîyene. Seba dermankerdişî cinî kêmêr muracat kenê. Cinî nê niminenê."

 

'Çareserîya nê têkoşînê cinîyan o’

 

Ayşe Ozdamar dîyar kerd ke kapîtalîzm bedenê cinîyan hedef gêno û wina va: "Dewlete dem bi dem tiryakî kena sey sektor. Tirkîya de hîn prosedur û xebatî est ê. La her çî ser kaxidan de maneno. Tirkîya de merkezê pakkerdişê tiryakî kêm bê zî la est ê. Heta ke şert û merc nêvuryê do şuxilnayîşê tiryakî dewam bikero. Ganî seba ciwanan wareyê komelkî bêrê akerdiş. Panzehrê nê perwerdeyêko baş o. Ganî cayê ke ciwanî xo aver berê bêrê akerdiş."

 

'Ma do rojeva xo de nêfînê'

 

Ayşe Ozdamar qiseykerdişê xo wina qedêna: "Ma Enqere, Hatay û Îzmîr de atolye akerd. Ma bi mamoste, komelnas, psîkologan reyde babetan munaqeşe kerd. Heyê nê huqûqî zî est ê. Eke kes bi tiryakî tê bigîro hetê komelî ra yeno durvistiş. Hetkarî wina nêbeno. Ganî nê hetê newî ra bêrê destgirewtiş. Ma do tiryakî rojeva xo ra nêfînê. Ganî bi taybetî cinî hemverê hişbirî de têkoşîn bikerê. Şar nê çî wazeno. Seba ke ma wayîrê aştîye vejîyê hewcedarîya ma bi ciwanan est a."