ÎZMÎR - Dayîka Aştîye Peyrûze Kurt mewlûdê kênaya xo de qisey kerd û va, "Ganî her kes semedê aştî û azadîye hewl bido."

 

Keyeyê Nûdem Kurt (Newal Mêrdîn), endama YJA STAR'î ke şerê serra 2024ine de Başûrê Kurdistanî de dinyaya xo bedelnaye, semedê kênaya xo, keyeyê xo de mewlûd da. Dayîkê Aştîye, rêxistinê qeza yê Partiya Têduştî û Demokrasî (DEM Partî) û Komeleya Anadoluyî ya Hetkarîya û Pêgirewtişê bi Kesê ke Merdimê Xo Vînî Kerdê (ANYAKAYDER) beşdarê mewlûdî bî.

 

'Ganî semedê aştîye tewr zêde hewl bêro dayîş'

 

Dayîka Nûdem Kurt, Peyrûze Kurt, merasîm de qisey kerd û dîyar kerd ke vengdayîşê "Aştî û Komelê Demokratîkî" ke Rayberê Şarê Kurdî Abdullah Ocalanî 27ê Sibate de kerdo, hêvî daya înan. Peyrûze Kurt va, "Sey dayîkî, ma hêvîya aştî û azadîya bi rûmet gênê. Labelê, her siba ma aya benê û zanê ke çekê kîmyewî ameyê şuxilnayîş û gerîla ameyê qetilkerdiş. Dayikê gerîla û dayikê leşkeran xeylêk bermayê. Nika goş bidê vengê dayîkan, dem roj bi roje derbas beno, dayîkî tewr xemgîn benê. Nika goş bidê vengê dayîkan. Proses muhîm û baş o. Semedê na aştîye tewr zêde hewl bidê, wa wayê û biratîya şaran bibo. Ganî êdî dayîkî nêbermê. Serekê ma semedê dewayêk pîl têkoşîn keno. Ganî her kes semedê aştîye û azadîye hewl bido.”