STENBOL - Dayîkê Şemeyî çalakîya xo ya nê hewteyî de neql kerdî ke edalet bêeşkerekerdişê rastî nîno bidestkerdiş. Awankerdişê Komîsyonê Heqîqetî lazimîyêk ke ganî nêro peysergirewtiş.

 

Dayîkê/Merdimê Şemeyî ke her hewte Meydanê Galatasarayî de kombîne ke çarenûsê merdimanê xo yê destbendkerdişî de vînî bîyê û ameyê kiştiş bipersê û sûcdarî bêrê muhakemekerdiş, çalakîya xo ya 1069ine organîze kerd. Dayîkê Şemeyî ke no hewte Meydanê Galatasarayî de bi qurnefîl û fotografê merdimanê xo yê ke destbendkerdiş de vînî bîyê kom bî, aqûbetê Îbrahîm û Edip Çelik persayî. Eşkerayîya çapemenîye ya çalakî hetê Sereka Şubeyê ÎHD ya Stenbolî Jiyan Tosun ra ame wendiş.

 

‘Komîsyonê Heqîqetî de lazimî yew a’

 

Jiyan Tosun dîyar kerd ke ê têkoşîn danê ke aqûbetê merdimê înan ê vînîbîyayeyan bimusê û va: "Ewro, ma reyke bîn xo rê anê vîrê xo; vernîya ke raştî bêro eşkerakerdiş, edalet pê nîno. Tena merdimê vînîbîyayeyan nê la eynî wextî de komel zî ganî bizano ka çi bi sereyê kesê ke demê destbendkerdişî de vînî bîyê û yê ma yê ke pey xo de verdayê, çi ciwîyenê.”

 

Hetê Hizbulahî ra ameyî vînîkerdiş

 

Jiyan Tosun dîyar kerd ke no hewte semedê zelalkerdişê aqûbetê Îbrahîm Çelîk û lajê ey Edip Çelîk ke hetê Hîzbûllahî ra keyeyê xo yê Êlihî ra ameyî girewtiş û vînîkerdiş, çalakî kerdê û va: “Muracatê Merese Çelik ke semedê cayê laj û mêrdeyê xo bimuso, bênetîce mendî. 31 serrî yo pêwa pêro muracatan tu netîce nêameyo girewtiş û sûcdarî ameyê pawitiş, Çiqas serrî derbaz bibê zî ma do tu wext fek waştişê edaletî semedê Îbrahîm Çelik û Edip Çelik, semedê pêro vînîbîyayeyanê xo vera nêdê û bîyarê vîrê her kesî ke ganî dewlete çarçewaya normê huqûqî yê gerdûnî de têbigêro.”

 

Çalakî bi ronayîşê qerenfîlan yê meydanê bi ablûqa peynî bî.