Beritan Tunç

 

ÎZMÎR - Cinîyê ke ser erdan xebitîyenê bê sîgorte, bi saetanê dergan û heqdestê qijan xebitîyenê. Cinîyê ke li qezaya Menderesî serayan de xebitîyenê dîyar kenê ke kedê înan nêvêneno û di hetê aborî de pirsgirêkan ciwîyenê.

 

Cinîyê karkerê ramitişî şertanê giranan ê bêasayîşî de xebitîyenê. Cinîyê ke berardişî wedarnenê, semedê polîtîkayanê dewlete û tedaya bazarî mehkûmê feqîrîye benê. Cinîyê ke qezaya Menderesî ya Îzmîrî de xebitîyenê derheqê binpaykerdişê heqan ê ke ciwîyenê de qisey kerdî.

 

‘Ma heqê keda xo nêgînê’

 

Zelal Ozbay ke serra 2000ine ra serayan de xebitîyena wina va: “Babîyê mi karkerîya serayî kerdêne. Labelê nika semedê kalbîyayîşî nêeşkeno bikero. Dimayê zewacê mi mi nê karî kerd. Labelê wina şoro do na meslege vindî bibo. Semedo ke ma heqê keda xo nêgînê. Tutê ma zî ma dir perîşan benê. Ma wazenê karê xo bikerê labelê no zî heta cayêk mumkin o. Sîgorteya ma çin a. Cinî şertanê giranan de xebitîyenê. Cinî nêbê no kar nîno domnayîş. Ma heqê keda xo nêgînê.”

 

‘Ma hesreta tutanê xo ciwîyenê’

 

Zelal Ozbay wina peynî ard: “Semedo ke ma berardişan biroşê ma muracatê bazariganan kenê. Labelê nêwazenê û berardiş destê ma de maneno. No zî motîvasyonê ma xirab keno. Berardişê ma pere nêkenê. Karkerîya ci xora ma kenê. Tutê ma perîşan benê. Ma semedê ameyoxê înan nêeşkenê çîyêk bikerê. Şertê xebitîyayîşê ma giran ê. Ma tutanê xo nêvînenê. Ma bi hesreta tutanê xo ciwîyenê. Ma wazenê sey merdim biciwîyê. Ma siba heta şanî xebitîyenê. Qet nebo ma heqê keda xo bigîrê.”

 

‘Wa keda ma bêro dîyayîş’

 

Cinîya bi nameyê Halîse Çelîk dîyar kerd ke serra 2001ine heta nika nê karî kenê û wina dewam kerd: “Sîgorteya ma çin a. Ma semedê kesanê bînan berardiş kenê labelê qezencê ma çin o. Ma her tim zirar kenê. Qezencêko ma yo daîmî çin o. Ma çi qezenc kenê şinê şîyayîşê zîraetî rê. Demo ke ma fatûreyê awe û elektrîkî danê çî nêmaneno. Waştişê ma yê yewine no yo ke keda ma bêro dîyayîş.”

 

‘Ma bi hêzê xo şîyayeyan gênê’

 

Cinîya bi nameyê Gulîstan Çelîk zî va ke 20 serrî yo Menderes de seravanîye kena û wina pê de şî: “Mêrdeyê mi nê karî kerdêne mi zî ey dir dest pêkerd. Şertê xebitîyayîşê aye giran o. Ma siba rew wurzenê, şinê sera. Sera germ a. Ver bi nîmerojî zaf germ bena. Ma nîmeroj yenê keye. Ma karê keyeyî kenê. Şan de honik beno ma ancî şinê. Ma zaf rincan benê. Cinîyê ke tutê înan est ê zaf zehmetîyan ancenê. Ma bi îmkananê xo şîyayîşan gênê. Ma hetê debarî de zehmetîyan ancenê. Hêzê ma yê ke şîyayeyê xo bigîro zî çin o. Ma cuyêke goreyê rûmetê merdimîye wazenê.”