Jiyan Gencan

 

DÊRIK - Fermandaranê YPJyî ra Viyan Kobanê bi wesîleya serrgêra awankerdişê YPJyî qisey kerd û va: “Bi fikr û felsefeya Rayber Apo do cinî destkewtişanê Şorişê Rojavayî bipawê.”

 

YPJ 4ê nîsana serra 2013ine de ame awankerdiş. Demê şerê mîyanênî yê Sûrîye de, şarê kurdî semedê pawitişê bîyayîşê xo hêzanê xo yê leşkerî awan kerd. Awankerdişê Yewîneyê Pawitişê Şarî (YPG) dir hêzê Rojavayê Kurdistanî semedê pawitişê şarê xo ame awankerdiş. Eynî wextî de Yewîneya Pawitişê Cinîyan (YPJ) ameye awankerdiş. Awankerdişê YPJyî dir cinî tewrê refanê têkoşînî bîyî. Heme wareyê şerî, komelî û sîyasî de cinîyan cayê xo girewtî. Yew sebebanê esasî yê awankerdişê YPJyî yê binê şertê şerî de, pawitişê destkewtişanê xo bî. Sewbîna hêza cinîyan semedê cimatê kurdî muhîmîyêk ci yê pîlî est o. Mîyanê şerî de YPJ bîyo serkêşê şerî. YPJ şerê DAIŞyî de hemverê hovîtîya înan şerêk bêeman domna. Heme xelaskerdişê bajarê Rojavayê Kurdistanî û zaf herêmê bînan de YPJ û YPGyî pîya bajar xelas kerdî. Xelaskerdişê bajarê kurdan de YPJ bîyo serkêşê şerî.

 

Yew fermandaranê YPJyî ra Viyan Kobanê bi wesîleya serrgêra awankerdişê YPJyî ajansê ma rê ercnayîş kerd.

 

‘YPJ bîyo roşnayîyêk mîyanê cimatî de’

 

Viyan Kobanê destpêkê qiseykerdişê xo de qalê armancê awankerdişê Yewîneya Pawitişê Cinîyan (YPJ) kerd û wina va: “YPJ mîyanê şerî de ame awankerdiş. Tarîxêk YPJyî yê dergî est o ke wina zaf şeranî mîyanê ra vîyart. Sûrîye de hêrişêk zafhetî cinîyan ser o yeno domnayîş. Vejîyayîşê YPJyî esasê xo de hemverê hişmendîya şerwazan de têkoşînêk zafhetî domnayîş bî û hema zî no têkoşîn bi zaf hetanê xo dewam keno. Serkêşîya têkoşînê YPJyî bi zafê fermandaranê fedaî pê ame. Zafê fermandaranê ma heta nefesê xo yê peyêne semedê ke no têkoşîn bireso armancê xo, şer kerdî û şehîd bîyî. YPJ bîyo roşnayîyêk mîyanê cimatê ma ke senîn destkewtişanê xo bipawo. Bi a roşnayîye cinî hişyar kerd ke bibo hêzêk û îradeyêk zaf pîl. Cinî bi roşnayîya YPJyî tewrê cigêrayîşê azadîye kewtî. YPJyî hêzê cinîyan vet orte û YPJyî dir cinî êdî tewrê refanê azadîye bîyî. YPJ tena wareyê leşkerî de nîyo, wareyê sîyasî û komelî de zî averşîyayîşanê cinîyan awan kerd û bîyî nimûne.”

 

‘Cinîyan bi Rayber Apo xo nas kerd’

 

Vîyan Kobanê roja 4ê Nîsane rojbîyayîşê Rayberê Şarê Kurdî Abdullah Ocalanî û awankerdişê YPJyî sey rojbîyayîşê heme cinîyan pênase kerd û wina va: “Cinîyan rojbîyayîşê Rayber Apo dir xo nas kerd, bi fikrê Rayber Apo cinîyan xo rêxistin kerd. Ez zî sey cinîyêka a roje dir mi xo nas kerd û semedê azadîye dest bi têkoşînî kerd. Cinî semedê ke destkewtişanê xo bipawê û wayîrê qîmetanê xo bivejê, rayîrê azadîye ser rêça Rayber Apo ser domnenê, o rayîrşîyayîş rayîrşîyayîşê azadîye yo. Do o rayîrşîyayîşê ma yê azadîye bi serkewtiş peynî bibo. Nika zî ma sey YPJ bi hişmendîya hezaran serrî şer kenê û têkoşîn kenê. Destkewtişê 14 serranê têkoşînêk bi bedelê giran nika yeno waştiş ke bêro çinkerdiş, la bi fikrî û felsefeya azade ma do hemverê a hişmendîye têkoşîn bikerê û heme destkewtişanê cinîyan bipawê.”

 

‘Ma sozê pawitişê destkewtişanê şorişî danê’

 

Viyan Kobanê tewr peyêne awankerdişê YPJyî heme cinîyan rê pîroz kerd û wina qedêna: “Cinîyanê kurdan serkêşîya têkoşînî kerdî û cinîyanê dinya rê bîyî îlhamê têkoşînî. Heme cinîyê ke zaf herêmê Ewropayî ra tewrê refanê YPJyî bîyî ma do a roje înan rê zî pîroz bikerê. Cinîyanê enternasyonal ke kîştê ma de hemverê çeteyê DAIŞyî şer kerdî û heta nefesê peyêne têkoşîn kerdî ma do înan qet xo vîr ra nêkerê. Ma heme cinîyan rê soz danê ke ma do destkewtişê şorişê xo bipawê.”