Evîn Çîftçî

 

RIHA - Wefatê dayîka Rayberê Şarê Kurdî Abdullah Ocalanî, Uveyş Ocalan ser o aye ke 75 serrîya cuya xo de bi xoverdayîş û serewedaritişê xo yena naskerdiş, 33 serrî vîyart. Kênaya aye Fatma Ocalan bi vatişanê “Serek dayîka ma ra îlham girewt” Uveyş Ocalane qal kerd.

 

Dayîka Rayberê Şarê Kurdî Abdullah Ocalanî, Uveyş Ocalan a ke bi têkoşînî û xoverdayîşê xo bîya îlham, 33 serrê verî dinyaya xo bedelnaye. Abdullah Ocalan bi vatişanê “Tofanêk serewedaritişî bî, sereyê xo tu kesî rê nêtewêna” dayîka xo qal keno û dîyar keno ke tutîye ra tesîrêk pîl ser o keno. Uveyş Ocalan a ke şahidîya ke mêrdeyê aye vernîya çimanê aye de yew cinî qetil keno, kerd, hemverê nê bêveng nêmanena, îfade dana û gamê verêne yê têkoşînê cinîyan erzena.

 

Uveyş Ocalan kam a?

 

Dayîka xoverdayoxe Uveyş Ocalan serra 1922ine de dewa Amarayî ya girêdayeyê Xelfetîya Rihayî de ameye dinya. Emrêk qijî de bi kesêk dewe nêzdîyê înan dir yena zewicnayîş. Bi nê zewacî dir cuya aye ya zehmetî dest pêkena. Aye bena şahidê qetilkerdişê yew cinîye hetê mêrdeyê xo ra, nê dadgehe de vana û bena sebeb ke o kes ceza bigîro. Dayîka Uveyş eynî wextî de zî hemverê hişmendîya pederşahî xo ver dana. Kesê ke mêrdeyê aye yo, zîndan de krîzê qelbî vîyarneno û mireno. Kênayêka dayîka Uveyş mêrdeyê aye yê verêna ra estbî. Dayîka Uveyş dimayê merdişê mêrdeyê xo agêrana verê keyeyê xo û dima ra zî Omer Ocalanî yê eynî dewe ra dir zewicêna. Zewacê dîyin dir zî têkoşîn û xoverdayîşê cuye dewam keno. Nê zewacî ra çar kênayî û hîrê lajê aye benê.

 

Uveyş Ocalan a ke bi şexsîyetû xo yê xoverdayoxî yena naskerdiş 4ê nîsana 1949ine de Rayberê PKKyî Abdullah Ocalanî ana dinya. Dayîka Uveyş zî têkoşînê hemverê nêweşîye dana. Semedê nêweşîya şekirî Edene de tedawî vînena. Nê têkoşînê cuye de peynîye de lingêk aye yena birnayîş. Dima ra tedawîya yew serrî 11ê nîsana 1993ine de semedê krîzê qelbî koçê peyêne kena. Cenazeya aye dewa Amarayî ke zaf hes kena de yena definkerdiş.

 

‘Hêrsê hemverê koletîya hezar serrî’

 

Abdullah Ocalan bale anceno ruhê xoverdayoxî yê dayîka xo Uveyş Ocalane ser û senîn rêçêk şexsîyetê ci ser de verdayo û wina qal keno: “Emrêk qijî de mi musna pêrodayîş. Hema ewro zî tesîrê mi ser o est o. Dayîka mi musna mi ke ez tu kesî ra meded nêpawî. Vatêne çi beno wa bibo cewab bide. Dewe de dayîka mi sey xoverdayoxe ameyîne zanayîş.”

 

Abdullah Ocalan dîyar kerd ke nêzdîbîyayîşê ci yê meseleya cinîyan ewnîyayîşê dayîka ci ra qewîmyeno û va: “Tesîrê dayîka mi mi ser o çinbîyane ez do semedê meseleya cinîyan wina hîsgêr nêbîyayîne. Tesîrê dayîka mi, bala mi ant cinîyan ser. Dayîka mi tesîrêk zaf xurtî mi ser o verda.”

 

Kênaya Uveyş Ocalan Fatma Ocalan dayîka xo qal kerd.

 

‘Serekî aye ra îlham girewtêne’

 

Fatma Ocalan va ke dayîka aye şexsîyetêk xoverdayox û serê xo nêtewênayîne bî û wina va: “Dayîka mi xoverdayox û serê xo nêtewênayîne bî. Serekî aye ra îlham girewt. Verê serekî tutêk dir pêrodayîş kerdibî. Wexto ke ame keye, dayîka mi ey şirawit û va şo heyfê xo bigîre. Dima ra dayîka tutî ameye va ez do şima gerre bikerî. Dayîka mi va ti şina ça şore. Ez şîya û şahidê na hedîseye bîya.”

 

‘Werrekna bidîne ke bîyo serek’

 

Fatma Ocalan peynîye de wina ard ziwan: “Verê dayîka mi ber nêgirewtêne. Vatêne do serek bêro. Her wext çimê aye rayîrî ser bî. Rojêke dayîka mi serekî rê va ‘semedê mi cil û belg bigîre’. Serekî zî va ‘lazim o o dem semedê heme dayîkan bigîrî. Tena semedê to nê.’“