STENBOL - Avûkataya OHDyî Sîda Yildiz rewşa bîyayeya prosesî derheqê çareserîya problemê kurdî û serrastkerdişanê qanûnî yê ke ganî bêrê kerdiş ercna û va ke gamanê ke semedê aştîye yenê eştiş, semedê ke hetê huqûqî de cewabê xo nêgînê, cimatî de benê sebebê endîşeyan.

 

Vengê “Aştî û Cimatê Demokratîk” ê Rayberê Şarê Kurdî Abdullah Ocalanî ser o yew serre vîyart û pêwa nê dewlete hema zî gamanê somutî nêeşta û no zî hetê şarê kurdî de sey meseleyêke muhîm yena rexnekerdiş. Hêvîya derheqê ke aştî do bireso asayîşê huqûqî dewam kena.

 

Avûkataya Komeleya Huqûqnasanê Semedê Azadîye (OHD) Sîda Yildiz rewşa bîyayeya prosesî û serrastkerdişanê qanûnî yê ke ganî bêrê kerdiş ercna û va: “Semedo ke gamê somutî nînê eştiş, vindarnayîşêk cidî awan keno.”

 

‘Atmosferêk nêzelal awan keno’

 

Sîda Yildiz dîyar kerd ke destpêkê prosesî ra heta nika hetê şarê kurdî ra gamî ameyê eştiş la hetê îqtîdarî ra proses yeno dergkerdiş. Sîda Yildiz wina ard ziwan: “Destpêkê prosesî ra hetê şarê kurdî ra gamê somut û cidî ameyî eştiş. La semedê ke hetê huqûqî de û statuyê komelî de gamêke somutî nînê eştiş, cimatî de atmosferêk nêzelaîye yena viraştiş.”

 

‘Wexto ke pratîkî de qelsî bibo, aştî zî mumkin nîya’

 

Sîda Yildiz dîyar kerd ke tesîskerdişê huqûqî hetê aştîye de muhîm o û wina dewam kerd: “Ganî huqûq lezkî bi hawayêk adilane bêro tesîskerdiş ke bawerîya aştîye xurt bibo. Ganî bêro zanayîş ke wexto ke huqûq pratîkî de rind nêro tespîtkerdiş, mumkin nîyo ke merdim qalê aştîyêk raştîne bikero. Aştî bi naskerdişê heq û waştişanê demokratîkî yê şarê kurdî mumkin bena. Hêvîya aştîye nîşan dana ke ganî lezkî serrastkerdişanê qanûnî bêrê kerdiş.”

 

‘Ganî dewlete xo bi gamanê somutî îspat bikero’

 

Sîda Yildiz qiseykerdişê xo wina dewam kerd: “Samîmîyetê îqtîdarî do bi gamanê somutî xo bimojno. Hemverê gamanê ke semedê aştîye ameyî eştiş ganî dewlete samîmîyetê xo îspat bikero. Proses bi hawayêk keyfî yeno dergkerdiş. Komîsyono ke meclîs de ame awankerdiş netîceya xebatanê di aşman de ganî gamanê somutî bi eştêne. La nê xebatî 7 aşmî dewam kerdî û 18ê sibate de raporêk hembeş pêşkêş kerd. Semedê eştişê gaman roşan ra dima mojna. La roşanî ser de demêk derg vîyart la hema gamêke nêameya eştiş.”

 

‘Ganî statuyê sîyasî yê Abdullah Ocalanî zelal bibo’

 

Sîda Yildiz bale ant muhîmîya prosesî û wina qedêna: “Ganî lezkî statuyê sîyasî û huqûqî yê Birêz Abdullah Ocalan zelal bibo. No hetê xesasîyê prosesî de zaf muhîm o. Dewlete pasîf manena. Ganî dewlete gamanê ke erzena de zelal bibo. Ganî heqî bikewê binê asayîşê desturê bingehênî. Ganî edalet vernî de dewlete ra bêro. Çimkî huqûq, sîstemê komelî yê dewlete yo. Heta huqûq pê nêro aştîyêke raştîne zî mumkin nîya.”