Jiyan Gencan

 

QAMIŞLO - Şervana YPJ’yî Narîn Axîn a bi eslê xo ereba ke bi birîndarî esîr kewte destê çeteyanê HTŞ’yî, dimayê 2 aşmî û nîme esîr mende, xelas bî. Narîn Axîn a ke behsê tewrbîyayîşê xo yê mîyanê YPJ’yî kerd, wina va: “Ez Têgêrayîşê Cinîyan û felsefeya Rayber Apo ra tesîr bîya. Dimayê ke mi Rayberî wend, mi waşt tewrê refanê YPJ’yî bibî.”

 

Şervana YPJ’yî Narîn Axîn ke wextê hêrişanê peyênî yê QSD’yî ser de bi birîndarî esîr ameye girewtiş, dimayê 2 aşmî û nîme ame veradayîş. Narîn Axîn ke bi xoverdayîş û hêzê xo namdar bî, mîyanê şert û mercanê zehmet de zî hêvîya xo vînî nêkerd û hemverê dişmin bî sembolê xoverdayîşî. Hîkayeya Narîn Axîn sey nimûneyêk xoverdayîşê cinîyan ê mîyanê YPJ’yî yena vînayîş ke şertanê tewr zehmet de zî eşkena hemverê zordarîye vindera û hêzê xo bimojna.

 

Şervana YPJ’yî Narîn Axîn rewşa xo ya esîrkerdişî û xoverdayîşê 2 aşmî û nîme ya ke da, ajansê ma rê vat.

 

Narîn Axîn behsê esîrkerdişê xo kerd û wina ard ziwan: “Wexto ke hêrişê çeteyan ê peyênî dest pêkerdî, ez Dêra Zorî de bîya û qerarê peyserantişê Dêra Zorî ma rê ame neqlkerdiş. Ma xo amade kerdî ke ma peyser biancê, la o wext eşîrê ereban hemine xo bi çeke kerdibî û hemverî ma vejîyayî meydan û mîyanê ma de şer virazîya. Ez o wext lingê xo ra birîndar bîya. Dimayê ci ez û yew hevala xo kewtî destê dişminî. Hevalan xeylêk hewl da ke ma xelas bikerê, la xeylêk zehmet bî. Dimayê ci min û hevala mi berdî zîndanê Dêra Zorî, dayî ma ro, îşkence kerdî û vatişanê nêweşî ma ra vatî. Mi ra vatî ‘Ti birîndara, la ma to derman nêkenê’. Vatî ‘Şima kênaya QSD’yî ya, ma şima derman nêkenê’. Çike ez ereb bîya, her çî mi ra vatî. Pêwa her çî zî ez tu wext bêhêvî nêbîya. Zîndan de tewr zêde mi ser de ameyîne û vatêne ‘Ti bi xo ereb a, ti senîn tewrê înan bîya?’ No nêzdîbîyayîş xeylêk zorê mi şîne. Coka zî xeylêk dayî ma ro.”

 

‘Ez her tim bi hêvî bîya’

 

Narîn Axîn dîyar kerd ke aye tu wext hêvîya xo pêwa şert û mercanê zehmetîyan vînî nêkerda û wina ard ziwan: “Ez her tim bi hêvî bîya, her tim hevalê şehîdî vîrê mi de bî. Xoverdayîşê zîndanî û têkoşînê Mazlum Doğanî vîrê mi de bî. Mi vatêne ‘Sey yew cinî, ganî ez xo ver bidî û têkoşîn bidî’. Mi xo ra vatêne ‘Ganî ez bi hêz bibî’.”

 

‘Resnayîşê hevalan semedê mi hewn bî’

 

Narîn Axîn hîsê xo yê wextê ke resaya hevalan zî vat û ard ziwan ke xoverdayîşê înan bi netîce bîyo: “Ameyî verê ma û vatî ‘Ma do şima verabidê’, ma nêzana rast o yan zî rast nîyo. Wexto ke ma resayî û ma hevalan dî, ez xeylêk kêfweş bîya. Wexto ke mi hevalan dî, sey tutêke dayîka xo bîvîno, wina kêfweş bîya. Nê demî ez o tu wext xo vîr ra nêkerî. Ez niha bi hêz a, armancê mi gird o. Ez o heyfê hevalanê xo yê şehîdan bigîrî û semefê hevalanê xo yê esîran ez o têkoşîn bidî. Heta yew hevalê ma destê dişminî de bibo, ez ê xoverdayîşê xo bidomnî.”

 

‘Dişmin bi çeke dayîne lingê min a birîndare ro’

 

Narîn Axîn ard ziwan ke demê esîrkerdişî de pêwa birîndar bîya ameya kuyayîş û nêameya dermankerdiş û wina dewam kerd: “Ez bi birîndarî kewta destê dişminî. Verê mi nêeşkayîne biewnîyayîne gonî ra, la bi a birîndarîya xo mi bi xo dermankerdişê xo kerd. Pêwa birîndarîya mi ameyîne û dayîne mi ro. Linga mi ra gonî ameyîne û serê guleyî diyar bi, mi bi kefîya xo linga xo girêda, la gonîya linga mi nêvindertêne. Yew hevala cinî zî kîşte mi de bî. A zî hetkarî da mi. Dimayê ke gonî kêm bî, mi guleyê linga xo de vet. Dişmin bi çeke dayîne linga min a birîndare ro.”

 

Narîn Axîn behs kerd ke sey yew cinîya erebe senîn YPJ’yî ra tesîr bîya û tewr bîya û va: “Ez Têgêrayîşê Cinîyan ra tesîr bîya, felsefeya Rayber Apo ra tesîr bîya. Dimayê ke mi Rayberî wend, mi waşt tewrê refanê YPJ’yî bibî. Ez cinîyêka ereb a, la mi fikrê Rayber Apo yê derheqê cinîyanê azadan de meraq kerdêne û nê esasî ser o tewrê YPJ’yî bîya.”

 

‘Sey şervanêke YPJ’yî ez o têkoşînê xo bidomnî’

 

Narîn Axîn sozê pîlkerdişê têkoşînî da û wina qiseyê xo qedêna: “Ganî çîyê ke ameyî ciwîyayîş nêrê xovîrrakerdiş. Dişmin her vatêne ‘Cinî bêhêz a’. La hêzê tewr gird cinî bi xo ya. Beno ke ez esîr ameya girewtiş, la no zeyîfî nîyo. Hêz û îradeyê mi xeylêk xurt o. Ez sey şervanêke YPJ’yî û sey yew cinîyêke erebe ez o têkoşînê xo pîl bikerî û bidomnî.”