AMED - Wendekara Zanîngeha Dîcleyî Berîvan Îgîn a ke tewrê Yewine Pêvînayîşê Kulturî û Sporî yê Ciwananê Peyasî ke hîrê rojan dewam kerd bî, dîyar kerd ke hedefê înan no yo ke kulturê piştîdayîşî û cuya komunal pîl bikerê.

 

Hetê Şaredarîya Peyasî ya Amedî ra Yewine Pêvînayîşê Kulturî û Sporî yê Ciwanan pê ame û zafê ciwanî tewrê ci bîyî. Programo ke hîrê rojan dewam kerd, ciwanan têkoşînê hembeşî munaqeşe kerdî. Çarçeweya festîvale de konser, atolye, aktîvîteyê sportîfî û forum pê ameyî. Atolyeyê ekolojîye û jîneolojîye pê ameyî. Turnuwayê voleybolî, basketbolî û futbolî û sewbîna programanê kulturîyê cîyayan pê ameyî.

 

Ciwanan dîyar kerdî ke armancê programî mûnayîşê cuya komunal û piştîdayîşî yo.

 

Wendekara Zanîngeha Dîcleyî Berîvan Îgîn festîvale ercna.

 

Ciwanî semedê pîlkerdişê cuya komunale ameyî têhet

 

Berîvan Îgîn eşkera kerd ke festîvale ke pê ame semedê piştîdayîş û rêxistinbîyayîşî, tecrubeyî rê zemînêk awan kena û wina dewam kerd: “Ez hevalê xo dir tewrê festîvale bîya. Zafê ciwanan ca girewtêne. Armancê pêvînayîşî no bî ke cuya kolektîf û komunal bêro mûnayîş û ciwanî pîya dem bivîyarnê û pratîkê cuya hembeşî aver berê. Ma şewa xo Parkê 75ine de çadiran de vîyarna. Ma hevalan dir demê xo vîyarnayî û sohbet kerd.”

 

 

‘Pratîkê cuya komunal vejîya vernî’

 

Berîvan Îgîn dîyar kerd ke atolye, programê sportîfî û rayîrşîyayîşê Hewselî pê ardî û bi nê dir îmkanê xurtkerdişê kulturê rêxistinbîyayîşî û piştîdayîşî bidest kerdî û wina dewam kerd: “Prosesê Aştî û Cimatê Demokratîkî est o. Serkêşî her wext qalê rêxistinbîyayîşê cuya komunal kenê. Na festîvale zî nê esasî de pê ameye. Roja verêne konser pê ame. Ciwanî tewrê bîyî. Bi şewe ma kewtî çadiran. Hevalî tîya munaqeşeyî domnayî. Roja bîne bi rayîrşîyayîş û sporî dest pêkerd. Dima ra atolyeya ekolojîye û jîneolojîye pê ame. Dima ra zî atolyeya Kursiya Serbest bi tewrbîyayîşê Hevala Şadîye pê ame. Demê bîn de rojanê çalakîyanê sporî yê sey voleybol, basketbol û futbolî pê ameyî. Musabaqa û kayê cîyayî ameyî kaykerdiş. Dima ra rayîrşîyayîşê Hewselî pê ame. Dima ra ma Amargî de arayî kerd. Ma festîvala xo wina peynî kerd.”

 

Hemverê polîtîkayê şerî zemînê tewr xurtî rêxistinbîyayîş o’

 

Berîvan Îgîn peynîya qiseykerdişê xo de veng da ke lazim o ke programanê wina zêde bikerê û va ke yew zemîno ke ciwanan feyde ci ra girewt no tewir program o. Berîvan Îyin wina qedêna: “Ma zanê ke ciwanan ser o polîtîkaya şerê taybetî zaf zêde ya. Fihûş û tîryakî tesîrêk pîl cinîwan ser o keno. Hemverê nê rêxistinbîyayîşê ciwanan muhîm o. Ganî ciwanî nê tewir programan de ca bigîrê. Ganî nê tewir programî zêde bibê. Sere de cinîyê ciwanî û heme ciwanî ganî nê prosesî de berpirsîyarî bigîrê. Sey serkêşî zî vatî ‘ma xo rêxistin bikerê û rêxistin bikerê’.”