AMED - Rayberê Şarê Kurdî Abdullah Ocalanî, mesaj şirawit 3ine Konferansê Pîlî yê Îslamê Demokratîkî rê û va: “Çîyê ke lazim o bêro kerdiş no yo ke destûr nêro dayîş ke îslam bikewo xizmetê dewlete, îqtîdar û hêzanê sermayedaran. Ganî ancî newe ra bi agêrayîşê cewherî ci, bikewo xizmeta cimatê exlaqî, sîyasetê demokratîkî û cuya azade.”

 

Federasyonê Cigêrayîşê Îslamî yê Mezopotamyayî (MÎA-FED) bi sloganê “Îslamo Demokratîk: Bawerîye de zerrîwazî cimatî de azadî” Eywana Alî Emîrî ya Şaredarîya Amedî de konferansê xo ya pîlî yê hîrine organîze kerf. Konferans de mesajê Rayberê Şarê Kurdî Abdullah Ocalanî ame wendiş. Emîn Ay mesaj bi kurmancîya kurdkî û Hatîce Şeker zî bi tirkî wend.

 

Mesajê Abdullah Ocalan wina yo:

 

“Beşdarê erjîyayeyî, bawermendê bi qîmetî yê konferansê îslamê demokratîkî;

 

Îslam cewherê xo de têgêrayîşêk komelî yê rastîye yo, qîmetanê azadî, edalet û têduştîye yê cimatê exlaqî û sîyasî ser o awan bîyo. Cimatê verêne yê îslamî ke bi serkêşîya Hz. Muhemmed pê ame, hemverê zordarîya sinife, kolonyalî û eşîrîye, bîyo gamêk pîl ê cimatê demokratîkî û aver şîyo.

 

La her çiqas dem vîyarto, nê cewherê azadîwaz û komelî yê îslamî, hetê îqtîdarê dewletperestan ra ame ablûqakerdiş. Proseso ke bi Emewîyan dest pêkerd de, dîn sîstemê exlaqî û cuya komelî ra ame dûrvistiş, vurîyayo hacetê meşrûbîyayîşê dewlete, nê dir ruhê demokratîkî yê azadîwazê îslamî ame qelskerdiş. Roja ma de hem bi îslamo fermî yê dewlete, hem zî hetanê mezhebperestî yê ke armancê înan îqtîdar o; nê vejîyayîşê tarîxî ra bi hawayê cîyayî yeno domkerdiş.

 

Mana û fehmê îslamê demokratîkî; manaya agêrayîşê qîmetanê exlaqî, wijdanî û azadîwazê ke cewherê îslamî de est o, dano. Yew referansanê tewr muhîmî yê tarîxî yê nê yewî Wesîqeya Medine ya. Wesîqeya Medine, peymana komelêk demokratîkî ya, cewherê bawerîyanê cîya, nasname, kultur û komalanê cîyayan pawit, înan bi cuya hembeşî ard têhet. Bi nê hetê xo, yew modêlanê verênanê cîyaperestî, yewîya demokratîkî û tarîxê merdimayî ya.

 

Cîhado raştîn têkoşînê merdimî yê hemverê nefsê xo yo. Têkoşînê dewam ê hemverê meylê îqtîdarî, ezezî, waştişê zordarîye û heme hawanê zilmî yo. Têkoşîno tewr pîl, têkoşîno ke merdim xo dir keno, xo vurîyeno û biresno rastîye yo. Heta ke kulturê xorexnekerdişî çinbo; ne azadîya şexsî ne zî ya komelî eşkena pê bêra.

 

Prensîbê şûra ya îslamî de, yew qîmetanê bingehênî yê cimatê demokratîkî yo. Şûra manaya bîyayîşê exlaqê hembeşî yê cimatî, pê dir girewtişê qeraran dano. Manaya ke cimat eşkeno îdarekarî kontrol bikero dano. Ruhê tarîxî yê sîyasetê demokratîkî, demokrasîyê herêmî û cuya komunal mîyanê nê fehmî de yo. Çîyê ke lazim o bêro kerdiş no yo ke destûr nêro dayîş ke îslam bikewo xizmetê dewlete, îqtîdarî û hêzanê sermayedarî. Ganî ancî bi agêrîyo cewherê xo, bikewo xizmetê cimatê exlaqî, sîyasetê demokratîkî û cuya azade. Dîn, ganî hacetê îqtîdarî nêbo, wijdanê cimatî bibo. Rastî tena bi rêxistinbîyayîşê azadî yê cimatî eşkena bêro bidestkerdiş.

 

Fehmo ke vernîya azadîya cinîyan gêno, xoza sey objeyêk zordarî bêsînor vîneno û mîyanê şaran de dişminî virazneno, tu carî cewherê îslamî temsîl nêkeno. Îslamê demokratîkî; perspektîfê cuya exlaqî yo, azadîya cinîyan, cuya ekolojîkî, yewbîyayîşê komelî û wayê-biratîya şaran esas gêno. Bi nê hetê xo tena semedê komalê misilmanan nê, semedê heme merdimîye yew çimeyê tewr muhîmî yê şaristanîya demokratîkî yo. Hemverê krîzanê ke Rojhelatê Mîyanênî de kûr benê, şerê mezhebî, pêrodayîşanê netewperestî û têkoşînê mîyanê îqtîdaran de çareserî; xurtkerdişê hêzanê dewletperestî û hegemon nîyo, averşîyayîşê cimatê demokratîkî yo.

 

Perspektîfê îslamê demokratîkî, eşkeno vernî akero ke şar bi nasnameyanê xo, bi bawerîyanê xo û îradeyê xo yê azade bieşkê pîya biciwîyê.

 

Ez bawer kena ke munaqeşe şima nê esasî de bikerê û netîceyê ke şima ci ra vejê; do semedê awankerdişê cimatê demokratîkî, cuya hembeşîya şaran û semedê prosesê Aştî û Cimatê Demokratîkî yê ke ma dest pêkerd bibo piştîdayîş, xebatanê şima de serkewtiş wazena.”