Rozerîn Gultekîn

 

AMED - Derheqê kerdoxê qetilkerdişê Mîne Ari, Onur Ariyî dimayê 8 aşman îdiname ame amadekerdiş. Avûkata dewayî, Evîn Korkmaz Ekîncî, îdianameyî ser o qisey kerd û va: “Rapor de tena qalê gullebîyayîşêk bêserûberî yeno kerdiş ke hêrsêk nişka ve ra pê ameyo. Ma qebul nêkenê ke şîdetê qetilkerê hemverê cinîye tena sey sanîyeyêk hêrsî bêro pêşkêşkerdiş. Ma do dewa heta peynîye taqîb bikerê.”

 

Derheqê Onur Ariyî ke 31ê teşrîna peyêne 2025ine de qezaya Misircî ya Sêrtî de bi çeke cinîya ey dir zewicîyaya Mîne Ari û apê xo Ozgur Ariyî kişt û dayîka xo M. Ariye, apê xo F. Ariyî û xaltîya xo N. Ariye birîndar kerd, çarçeweya cipersayîşî de hetê Serdozgerîya Komare ya Sêrtî ra îdiname ame amadekerdiş.

 

Avûkata dewa, Evin Korkmaz Ekîncî, dosya ser o ercnayîş kerd.

 

Dimayê 8 aşman îdiname ameye amadekerdiş

 

Evîn Korkmaz Ekîncî dîyar kerd ke sucdar Onur Ari; Mîne Ari û di kesan ê ke ameyî ke aye bixelesnê kişt û hîrê kesê bînan zî birîndar kerd û va ke îdiname dimayê 8 aşman ame amadekerdiş. Evîn Korkmaz Ekîncî va: “Nê qonaxî de kêmasî est ê; ma delîl waştî. Çi heyf, nê kêmasî bi hîrayî nêameyî çareserkerdiş û ne îdianameyî de, ne zî raporê destpêkî de qalê înan nêameyo kerdiş. Raporê destpêkî tena qalê gullebîyayîşêk bêserûberî keno ke hêrsêk nişka ve ra pê ameyo. La ma do pawitişa xo ser nê çî nêkerê. Ma yewser cipersayîşêk plankerdiş ê bi zaneyî kenê ke ey zanayîne ke cinî diganî ya û mêrdeyî aye aye hedef girewt. Armanc û waştişê ma no yo ke delîlî bi baldarî bêrê cipersayîş. Ma nika dewaya cinîyêk ewnîyenê ke do heta peynîya cuya xo nêeşka qisey bikero yan zî xo bipawo û ma hewl danê ke berjewendîyanê di tutanê qijî yê ke pey xo de verdayî bipawê. Nê dewayan de yeno dîyayîş ke seydî 90 mexdurî yenê sucdarkerdiş ke mexdure kena verê persan. La yê ke tîya do bêro muhakemekerdiş bi rastî sucdar o, ne mexdure Mîne Ari ya. Tu cinî nêeşkena sey sebebêk semedê şîdetê qetilkerî bêro şuxilnayîş. Yê muhîm tîya heqê cuye yê cinîye yo

 

150 cinîyî ameyî kiştiş

 

Evîn Korkmaz Ekincî wina dewam kerd: “Eke bîyayîşê çekanê şexsî biameyîne astengkerdiş, Mine gane bîyîne. Eke sucdar nêzanayîne ke semedê provokasyonî cezaya ci kêm bena, Mine Ari ganî bîyayîne. Çi heyf, polîtîkaya bêcezaverdayîşî komalan ke hetê mêrdan ra serdest ê wina vila bîya ke sey stargehê verêne yeno dîyayîş. Piştîdayîşê medyayî nê meseleyan de zaf muhîm o. Çimkî çîyê ke ma tîya qalê aye kenê tena Mîne Ari nîya; çîyê ke ma qalê ci kenê problemê komelî yê qetilkerdişê cinîyan o. Her çiqas ma qalê Mîne Ari bikerê zî nika cayêk de yew cinî yena kiştiş. Dimayê qetilkerdişê Mîne Ariye, teşrîna peyêne 2025ine ra zêdeyêrî 150 cinî ameyî kiştiş.

 

Ma qebul nêkenê ke şîdetê qetilkerê hemverê cinîyan tena sey hêrsêk nişka ve ra problemêk mîyanên, munaqeşeyêk nişka ve ra yan zî kêmasîyêk psîkolojîkî bêro mojnayîş. Çimkî wexto ke bi nê hawayî yeno mojnayîş, nê hedîseyî benê çîyêk asayî. Cuya Mîne Ariye yan zî cuya cinîyanê bînan zaf muhîm nîna dîyayîş. Ma wazenê ke nê çî bêrê astengkerdiş. Ma do heta peynîye taqîbkerê dewa bibê.”