AMED - Bazara Kedê ya Jinan ku bi pêşengiya Gerînendetiya Polîtîkayên Jinan a Şaredariya Peyasê tê rêvebirin, bi vekirina du cihên kar ên nû berdewam dike û mezin dibe. Ev bazar ku berhemên ji destên jinan tên ba hev, ji bo xurtkirina jinan di warê aborî û civakî de beşdariyeke girîng dike.

 

Yek ji projeyên jinan ên Şaredariya Peyasê, Bazara Kedê ya Jinan e ku du dikanên nû, yên ku berhemên ji destên jinan tên hilberandin têne firotin, hat vekirin. Di merasîma vekirinê de, Hevşaredara Peyasê Bêrîvan Gulşen Sîncar, endamên meclîsa şaredariyê û alîkarên hevşaredaran amade bûn.

 

Navenda hevkarî û hêviyê !

 

Di axaftina xwe ya di merasîma vekirinê de, Hevşaredar Bêrîvan Gulşen Sîncar destnîşan kir ku armanca Bazara Kedê ya Jinan ew e ku ked û afirîneriya jinan xuya bike. Bêrîvan Gulşen Sîncar di berdewamiya axaftina xwe de wiha domand: “Em ji bo ku jin di jiyana aborî û civakî de roleke çalaktir bigirin dest dixebitin. Bazara Kedê ya Jinan di vê rêyê de yek ji gavên me yên berbiçav e. Ev bazar ne tenê cihekî hilberînê ye, di heman demê de navenda hevkarî û hêviyê ye jî.”

 

Hevşaredar Bêrîvan Gulşen Sîncar diyar kir ku wekî şaredarî, piştgiriya ji bo jinan wê bi berdewamî zêde bibe û bazar wê berdewam bike ku bibe platformek e ku potansiyela jinan derxîne holê be.

 

Hilberînên di warên cûda de

 

Bazara Kedê ya Jinan, bi beşdariya 40 jinan karên xwe didomîne, di pênc xebatên cûda yên wekî çêkirin û amadekirina çente, dirûtin, hişkirina sewze û nebatên bîhnxweş de berhem ji destên jinan têne hilberandin. Her berhemek bi xebatên bi ked û hezkirin ên jinan têamadekirin û di bazarê de bala gelê herêmî û mêvanan bi xwe dikşîne. Jin li vir hem hûnerweriya xwe pêş dixin hem jî bi berhemên xwe bi firotinê di warê aborî de ji malbatên xwe re dibin alîkar.

 

Bazara Kedê ya Jinan ne tenê platformeke firotinê ye, di heman demê de navendeke hevkarîyê ye ku rê dide jinan bêhtir beşdarî jiyana civakî û aborî bibin. Şaredariya Peyasê ji bo mezinkirina bazarê û piştgirîkirina zêdetir a hilberîna jinan xebatên xwe didomîne.

 

Ji hemwelatiyan piştgiriya 

 

Welatî û esnafên ku beşdarî li Bazara Kedê ya Jinan dan û stendinan dikin, razîbûnên xwe anîn ziman. Qalîtea û resentiya berhemên ku li bazarê têne firotin, bi temamî tên pesinandin.

 

Bazara Kedê ya Jinan, wekî mînakeke berbiçav a Gerînendetiya Polîtîkayên Jinan e ku dike armanc, bibe çavkaniyeke îlhamê ji bo navendê û şaredariyên din. Mezinbûna bazarê wekî gaveke hêvîdar tê dîtin ji bo ku jin azadiya xwe ya aborî bi dest bixin û rola xwe ya di nava civakê de xurt bikin.