STENBOL - Di çalakiya xwe ya vê hefteyê de, Dayikên Şemiyê bal kişandin ser 30'ê Tebaxê, Roja Navneteweyî ya Windakirinên Bi Zorê û daxwazên xwe yên ji bo avakirina aştiyê anîn ziman.

 

Dayikên/Mirovên Şemiyê, ku her hefte li Qada Galatasarayê dicivin da ku aqûbeta xizmên xwe yên ku di bin çavan hatin windakirin an hatine kuştin bipirsin û sûcdar bên  darizandin, çalakiya xwe ya 1066'emîn li dar xistin. Dayikên Şemiyê, ku li Qada Galatasarayê bi qurnefîl û wêneyên xizmên xwe yên ku di binçavan de hatin windakirin an jî kuştinkom bûn, vê hefteyê derbarê 30'ê Tebaxê, Roja Navneteweyî ya Windakirinên Bi Zorê de daxuyaniyek dan. Sebla Arcan daxuyanî xwend. 

 

'Aştî bi zelalkirina rabirdûyê mimkun e'

 

Sebla Arcan, destnîşan kir ku îro, 30'ê Tebaxê, Roja Navneteweyî ya Windakirinên Bi Zorê ye û bi vê rojê re hatiye armanckirin ku  windakirinên bi zorê bên bibîranîn û lêgerîna malbatên wan a ji bo edaletê bê eşkerekirin û wiha dewam kir: "Em dizanin, me tecrûbe kiriye: Windakirinên bi zorê ne tenê jiyana windakiriyan lê di heman demê de jiyana xizmên wan jî tê dibe. Ew xizmên windakiriyan mehkûmî jiyana aloz dikin. Ev alozî 'êşa herî mezin' e. Ragirtina aqûbeta windakirinan di tariyê de û parastina sûcdar û sûcdaran bi mertalê bêcezatiyê rê li ber başbûna birînan digire. Lêbelê, veşartina rastiyê birînên kûr di bîra kolektîf de vedike û trawmaya nifşan didomîne.

 

Ji ber vê yekê, daxwaza malbatên windakiriyan a zanîna rastiyê ne tenê armanc dike ku bigihîje windakiriyên xwe; di heman demê de armanc dike ku deriyê aştiyek bi rûmet û mayînde ji bo her kesî bi riya rastiyê veke. Ji ber ku aştiya mayînde bi naskirin û başbûna birînan mimkun e. Me gotiye û em ê berdewam bikin û bêjin: Aştiyeke mayînde ne tenê bi rawestandina pevçûnan, lê di heman demê de bi zelalkirina dadperwerane ya rabirdûyê mimkun e. Daxwaza rastî û edaletê ne tenê pêdiviyeke takekesî ye ji bo malbatên windayan; ew şerta bingehîn a aştiya demokratîk e.

 

Daxwazên Dayikên Şemiyê

 

Sebla Arcan daxwaz wiha anîn ziman:

 

"*Divê cihê windayên me were eşkerekirin, gorên wan werin dîtin û rastî were eşkerekirin.

 

*Divê sûcdar û berpirsiyar werin darizandin, bêcezatî bi dawî bibe û edalet pêk were.

 

*Divê dewlet bi rabirdûyê re rûbirû bibe û hesab were xwestin.

 

*Divê rêziknameyên qanûnî werin çêkirin da ku pêşî li dubarebûna windakirinên bi zorê were girtin û divê mekanîzmayên bi bandor werin damezrandin.

 

Em ê bi israr van daxwazan bişopînin. Bi boneya 30'ê Tebaxê, Roja Navneteweyî ya Kesên Windakirî yên Bi Zorê, em ji we re tînin bîra we: Kesên aştîxwaz winda nakin. Dema wê ye ku em aştî û demokrasiyê hîn bi dengekî bilindtir bixwazin. Dema wê ye ku em bi hev re ji kesên ku dixwazin hêviya aştiyê bi kar bînin re 'na' bibêjin."

 

Piştî ku qurnefîl li qada dorpêçkirî hatin danîn, çalakî bi dawî bû.