NAVENDA NÛÇEYAN - Meclîsa Dayikên Aştiyê yên ji gelek bajaran ber bi Enqerê ve bi rê ketin, daxwaz dikin ku di çarçoveya Pêvajoya Aştî û Civaka Demokratîk de gavên berbiçav werin avêtin.

 

Meclîsa Dayikên Aştiyê ji bo daxwazkirina gavên berbiçav ên di çarçoveya Pêvajoya Aştî û Civaka Demokratîk de diçe Enqerê. Dayikên Aştiyê ku sibeha 2'ê Mijdarê digihîjin Enqerê, pêşî dê li Parka Parlamentoyê civîneke çapemeniyê ya girseyî li dar bixin. Piştî civîna çapemeniyê, ew ê ber bi Parka Kurtuluş ve biçin û di tevahiya şeva 2-3'ê Mijdarê de "nobedariya aştiyê" li dar bixin. Di roja duyemîn a çalakiyê de, ew ê beşdarî civînên komê yên partiyên siyasî yên li Meclîsa Mezin a Neteweyî ya Tirkiyeyê bibin û bi şandeyên partiyan, Wezareta Dadê û rayedarên Serokkomar re rasterast hevdîtinan bikin.

 

Şirnex 

 

Dayikên Aştiyê yên Botanê li navçeya Cîzîr a Şirnexê kom bûn û ber bi Enqerê ve çûn. Dayik serê sibê li avahiya navçeya Partiya Wekhevî û Demokrasiyê ya Gelan (DEM Partî) civiyan, li otobusan siwar bûn û çûn.

 

Dayikan tekez kirin ku ew ji bo aştiyê diçin û peyama "Em ji bo pêkanîna aştiyê ber bi Enqerê ve diçin" dan.

 

Wan 

 

Endamên Meclîsên Dayikên Aştiyê yên ji Wan, Colemêrg û Tetwanê li Parka Musa Anter kom bûn û ber bi Enqereyê ve çûn. Dayikên Aştiyê gelek caran dirûşmeyên wekî "Bijî berxwedana zindanan" û "Jin, jiyan, azadî" berz dikirin.

 

Amed 

 

Dayikên Aştiyê, ku li Parka Koşuyolu ya navçeya Rezan a Amedê kom bûn, civîneke çapemeniyê li dar xistin. Dayika Aştiyê Afîfe Kartal di civîna çapemeniyê de diyar kir ku ew diçin Enqerê da ku ji dewletê gavên berbiçav, di nav de serbestberdana fizîkî ya Rêberê Gelê Kurd Abdullah Ocalan û azadiya girtiyên siyasî, bixwazin.

 

Piştî daxuyaniyê, ew bi qîrîna dirûşmeyên wekî "Bijî berxwedana zindanan" û "Jin, jiyan, azadî" derketin rê.