Ciwanan 25 welatan de seba ameyoxê xo çalakî kerd

  • 13:43 21 Mijdar 2026
  • Rojane
MERKEZÊ XEBERAN - Ewropa de 25 welatan de ciwanan seba heqê perwerde û debirîyayîşî û vera zêdebîyayîşê qîymetê her çîyî, krîzê îklîmî û mîlîtarîzmî çalakî kerdî.
 
Ewropa de wendekar û kedkarê ciwanî bi vengê “Ma seba ameyoxê xo têkoşîn kenê, seba şeranê înan ney” vejîyayî kuçeyan. Bi vengdayîşê Koalîsyonê Mîyanneteweyî yê Grewa Ciwanan ke 50 rêxistinanê wendekaran ra zêdeyêr ra ware yeno, 25 welatan de çalakî ameyî kerdiş. Çalakîyan de ciwanan waşt ke hîna zaf budçe perwerde û xizmetanê sosyalan rê bêro cîyakerdiş; heqê debirîyayîşî, meaşo ke merdim heq kenê û edaleta îklîmî bêrê dayîş û xercê ke seba mîlîtarîzmî yenê kerdiş, kêm bibê.
 
Îtalya de 10 hezar protestokeran piştdayîşê grewa pêroyîye kerd. Fransa, Brîtanya, Portekîz, Almanya û welatanê bînan de çalakî bîyî tevgerêko muşterek ê Ewropa.
 
Çalakîyê tewr qelebalixî Îtalya de bîyî: Grewa pêroyîye ya konfederasyonê sendîkayan CGIL’î ke wendekarî zî tewrê aye bîyî, ame kerdiş. Serekê CGIL’î Maurizio Landini îdia kerd ke 100 şaristanan ra zêdeyêr de mîlyonan kesî tewrê çalakîyan bîyê. Wezaretê Karanê Zereyî zî hûmarî nêdayî. Bologna de mabênê polîsan û çalakîkeran de pêrodayîş vejîya. Fransa de çalakîyê ke hewteyan o dewam kenê, bîyî piştdayîşê Ewropa. Almanya de, Berlîn de nêzdîyê 4 hezar kesî kom bîyî, Koln de hezaran wendekarî rayra şîyî, London de zî sedan kesan protesto kerd.
 
Portekîz de plano pawitişî yê Yewîya Ewropa yê 2030, Readiness ame rexnekerdiş. Eşkerayîya muşterekî de ame waştiş ke mîlîtarîzm û eskerîya mecbûrîye wedarîyo, seba perwerdeyî budçe bêro cîyakerdiş, piştdayîşê Fîlîstînî, edaleta îklîmî û sosyale bica bêro.
 
Koalîsyonî dîyar kerdbi ke 400 şaristanan de çalakî ameyê planîkerdiş la qeyda înan eşkera nêbîbî. Tayê welatan de yeno texmînkerdiş ke çalakî do 21-22ê teşrîna peyêne de dewam bikerê.